A ka nevojë për parti të reja shqiptare në Maqedoni ?
Në politikën shqiptare të Maqedonisë së Veriut po përsëritet një dukuri: çdo cikël zgjedhor sjell parti të reja, por jo zgjidhje për problemet e shqiptarëve. Paralajmërimet për parti të reja nga Ziadin Sela, Fatmir Limani, Arben Fetai, Haqim Ramadani, Shkodran Halili, planet e Besim Hodës dhe formimi i lëvizjes “Arbëria”, krahas VLEN-it, BDI-së e PDSH-së, e bëjnë skenën politike më të fragmentuar se kurrë.
Ndërsa shumë parti krijojnë përshtypjen e pluralizmit, numri i tepruar dobëson fuqinë politike të shqiptarëve. Shumë iniciativa lindin nga ambicie personale dhe pakënaqësia me partitë ekzistuese, apo nga pragjet e ulëta zgjedhore që nxisin formime të vogla lokale. Por kjo sjell rreziqe: shpërndarje të votës, humbje mandatesh, koalicione pa parime dhe krijimin e partive të përkohshme që shuhen shpejt.
Asaj që i duhet politikës shqiptare në RMV nuk është më shumë parti, por parti më cilësore: demokraci të brendshme, transparencë, vizion afatgjatë dhe vendosje të interesit kolektiv mbi atë personal. E ardhmja nuk varet nga numri i subjekteve, por nga serioziteti dhe kapaciteti i tyre.
/ms
