A e dini sa i pasur është Mickoski ?

Ora e shtrenjtë e kryeministrit Hristijan Mickoski, e vërejtur gjatë pjesëmarrjes së tij në Forumin Ekonomik Botëror në Davos, është shndërruar në temë të re përplasjeje politike mes pushtetit dhe opozitës. Ajo që për VMRO-DPMNE-në është pasuri e fituar në mënyrë të ndershme para hyrjes në politikë, për LSDM-në është simbol i një mentaliteti ku funksioni shtetëror trajtohet si biznes privat.Opozitarja LSDM reagoi duke vënë në pikëpyetje vlerën e orëve të kryeministrit, të cilat, sipas tyre, kapin shumën e rreth 150 pagave minimale, duke theksuar se një punëtori në Maqedoninë e Veriut i nevojiten më shumë se një dekadë punë për të fituar aq sa kushton një orë luksi i Mickoskit.

“Në vend që të flasë për paga më të larta dhe standard më të mirë jetese, Mickoski shfaqet me orë luksoze. Për VMRO-në dhe ZNAM-in, shteti është biznes privat, ndërsa për qytetarët nuk ka para – vetëm për tenderë”, thuhet në reagimin e LSDM-së.Nga kjo parti theksojnë se arsyetimi i VMRO-DPMNE-së vetëm sa e konfirmon këtë logjikë, duke nënvizuar se funksione si drejtori në ELEM apo këshilltar i ish-kryeministrit Gruevski, po paraqiten si “biznes privat”.

Në anën tjetër, VMRO-DPMNE reagoi ashpër, duke i quajtur akuzat e LSDM-së hipokrite dhe të pabazuara. Nga partia në pushtet theksojnë se nuk është sekret që Mickoski, para se të hyjë në politikë, ka punuar në sektorin e energjetikës dhe ka bashkëpunuar me kompani ndërkombëtare, duke siguruar të ardhura të deklaruara dhe transparente. “Gjithçka që ka fituar kryeministri Mickoski është e ndershme, e ligjshme dhe e shpjeguar në detaje. Që nga hyrja në politikë, ai ka ndërprerë çdo aktivitet biznesor privat”, thuhet në reagimin e VMRO-DPMNE-së.

Nga partia në pushtet, krahasimi bëhet me ish-zyrtarët e LSDM-së, duke përmendur Filipçen dhe Zaevin, për të cilët pretendojnë se nga njerëz pa pasuri janë shndërruar në milionerë gjatë ose pas ushtrimit të pushtetit, me prona dhe investime të dyshimta brenda dhe jashtë vendit. “Nëse LSDM ka dyshime për veprime të paligjshme, le t’u drejtohet institucioneve që vetë i ka kontrolluar për vite me radhë. Para se të flasin për orët e Mickoskit, le të shikojnë në oborrin e tyre”, përfundon reagimi i VMRO-DPMNE-së.

500.000 EURO TATIME PERSONALE
Informacioni nga kompania “IFL Watches” rreth vlerës së orëve të 20 udhëheqësve të NATO-s e ka vënë përsëri në rend të ditës çështjen se sa i pasur është kryeministri Hristijan Mickoski, çfarë lloj prone ka, kur e ka fituar atë dhe si. “IFL Watches” thotë se Mickoski ka një orë IWC me vlerë 6900 dollarë dhe se është ndër më të shtrenjtat midis udhëheqësve të NATO-s. Më e lira është në pronësi të kryeministrit norvegjez Jonas Gahr Store – një “Swatch” me vlerë 84 dollarë. Tema e orëve të Mickoskit ka qenë prej kohësh e pranishme në publik. Ai vetë pëlqen të flasë për to si një detaj i veçantë i personalitetit të tij. Në një intervistë televizive, shkruan Nezavisen.mk, kur u pyet për orën e shtrenjtë që mbante, ai tha se i ishte veçanërisht e dashur për të, sepse ishte një dhuratë nga gruaja e tij, e cila është mësuese e gjuhës maqedonase në shkollën e mesme “Orce Nikolov” në Shkup.

Megjithatë, politikanët në Maqedoninë e Veriut i fshehin të dhënat mbi pasurinë e tyre sikur të ishin një sekret nga i cili varet mbijetesa e shtetit. Nuk është vetëm kjo gjeneratë politikanësh. Betimi i heshtjes ka qenë në fuqi për dekada.
Pra, sa i pasur është Hristijan Mickoski, nëse mund të mbajë orë kaq të shtrenjta? Dhe nëse, dukshëm, në vitin ose dy vitet e fundit është veshur jashtëzakonisht shtrenjtë! Në njërën nga seancat e Parlamentit për pyetje deputetësh, duke dashur të provojë se sa besnik është qytetar i Maqedonisë dhe institucioneve të saj, ai tha se kishte paguar 500.000 euro tatime personale mbi të ardhurat e tij. Tatimi personal është 10 për qind, që do të thotë se vetëm sipas këtij rrëfimi, Mickoski ka fituar 5 milionë euro. Këto mund t’i quajmë “zyrtare”, sipas deklaratës së tij në Parlament.

Në deklaratën e djeshme të VMRO-DPMNE-së, në përgjigje të deklaratës së LSDM-së për orët e shtrenjta të Mickoskit, thuhet se “nuk është sekret që, para se të hynte në politikë, Mickoski ka punuar në sektorin e biznesit në sektorin e energjisë, ku bashkëpunonte me kompani të njohura botërore dhe fitonte mirë”. Kjo, sipas reagimit të VMRO-së, deri në momentin para se të hynte në politikë, kur ai ndaloi çdo lloj biznesi dhe të punonte për kompani private. “Dhe më e rëndësishmja, gjithçka është e ndershme, transparente dhe e shpjeguar në detaje rreth të ardhurave që kishte””, thuhej në reagimin e VMRO-së.

Por, le të shohim se si shpjegohen në detaje të ardhurat e tij. Udhëzuesi më i mirë duhet të jetë pyetësori i Komisionit kundër korrupsionit. Sipas të dhënave të 27 prillit 2024, menjëherë pas zgjedhjeve, Hristijan Mickoski, atëherë ende deputet, deklaroi statusin e mëposhtëm të pronës: Ai ka një shtëpi në lagjen “Vlae” të Shkupit me një sipërfaqe prej 343 metrash katrorë, me vlerë 437.000 euro. E bleu në vitin 2014. Ai kishte një kredi prej 406.000 denarësh. Orët e dorës janë të listuara: njëra kushton 13.400 euro, dhe e dyta është dukshëm më e shtrenjtë – madje 39.000 euro. E para është blerë në vitin 2015, dhe e dyta në vitin 2016. Në vitet 2016 dhe 2017, Mickoski ishte drejtor i ELEM. Ai gjithashtu paraqiti një pikturë artistike me vlerë 10.000 euro. Ai nuk zotëron veturë.

Megjithatë, kompania “IFL Watches” thotë se ora IWC e Mickoskit vlen 6900 dollarë, në euro 5800. Kjo do të thotë se Mickoski deklaroi në pyetësor se një nga orët vlen shumë më tepër se çmimi i saj i tregut. Ose është një orë e tretë, gjithashtu e shtrenjtë.

Këto janë “detajet” që janë të disponueshme publikisht në lidhje me pronën që ka Mickoski dhe të cilat janë “të ndershme dhe transparente”, siç thotë partia e tij VMRO-DPMNE. Publiku nuk e di se me cilat kompani të famshme botërore në fushën e energjisë Mickoski bashkëpunoi në kohën e tij para-politike. Dhe si punonte me aksionet në bursë. Në atë kohë parapolitike, ai bleu shtëpinë e madhe që vlente shumë para në atë kohë (dhe edhe më të madhe tani) për 437.000 euro. Meqenëse kredia që është e listuar në pyetësor është e vogël (pak më shumë se 6000 euro), kjo do të thotë që Mickoski nuk iu drejtua bankave për ndihmë për të blerë pronën shumë të vlefshme. Ndoshta e bleu me paratë që kishte, kjo nuk sqarohet.

Në energji, mund të fitosh mirë, shumë mirë dhe madje shkëlqyeshëm. Ministrja e Energjisë, Sanja Bozhinovska është një shembull i mirë i kësaj. Ajo jep shumë detaje të tjera në pyetësorin e saj: Dy apartamente në Spanjë dhe Maqedoni, një në Portugali dhe një në Serbi. Vlera e apartamenteve të deklaruara të Bozhinovskës tejkalojnë 1 milion euro. Pyetësorët e Komisionit Kundër Korrupsionit rendisin vetëm pronat që zyrtarët pretendojnë se kanë. Disa prona mund të mos jenë deklaruar. Por më e rëndësishmja, nuk ka të dhëna se si i kanë fituar paratë zyrtarët aktualë dhe në cilat kompani para se të bëheshin faktorë në politikë. Ata nuk e kanë një detyrim të tillë me ligj dhe ndoshta nuk do ta kenë as në të ardhmen. Megjithëse VMRO-DPMNE thotë se “gjithçka është e ndershme, transparente dhe e shpjeguar në detaje rreth të ardhurave të tij”.

SHFAQJE LUKSI NGA ANA E UDHËHEQËSVE
Debati për orën e Mickoskit nuk është i fundit lidhur me raportin e politikanëve me luksin, pushtetin etj. Një temë e ngjashme ishte javë më parë kur me BMW-në luksoze kryetari i Tetovës, Bilall Kasami, mbërriti në takimin e liderëve, një detaj që mori vëmendje të opinionit dhe u shndërrua shpejt në debat publik.
Aktivisti Arjan Xhaferi ka ngritur alarmin për kontrastin e rrezikshëm mes luksit të pushtetit dhe varfërisë së përditshme të qytetarëve. Në një vend ku standardi i jetesës mbetet i ulët, ku paga mujore mezi mbulon shpenzimet bazë dhe ku mijëra familje jetojnë nën presionin e borxheve, çdo shfaqje luksi nga ana e udhëheqësve, sipas Xhaferit nuk është thjesht mungesë ndjeshmërie, por një padrejtësi morale. Sipas tij, është thellësisht shqetësuese që një shtet i cili për nevoja elementare mbështetet në donacione të huaja nga autoambulancat e deri te pajisjet për institucionet bazë zgjedh të shpenzojë buxhetin publik për vetura luksoze dhe privilegje të panevojshme për funksionarët e lartë. Ky realitet e kthen luksin qeveritar në simbol të shkëputjes totale nga jeta reale e qytetarëve.

“Një udhëheqës i përgjegjshëm duhet ta kuptojë se pushteti nuk është shpërblim personal, por përgjegjësi publike. Luksi i tepruar në majë të pushtetit krijon ndarje, rrit mosbesimin dhe thellon hendekun mes qytetarëve dhe institucioneve. Në vend të modestisë dhe solidaritetit, ai dërgon mesazhin se sakrifica vlen vetëm për qytetarin e thjeshtë, jo për ata që marrin vendime në emër të tij”, shprehet aktivisti Arjanit Xhaferi. Sipas tij, shoqëria ka nevojë për udhëheqës që japin shembull, jo për figura që e shohin pushtetin si mundësi për privilegj. Vetëm një qasje e tillë mund të rikthejë besimin, dinjitetin dhe ndjenjën se shteti është në shërbim të qytetarëve, e jo anasjelltas.

/koha.mk