A e dini Cilat janë bukët më të mira për shëndetin..!?

Në një botë ku drithërat mund të etiketohen si “ushqim i dëmshëm”, përzgjedhja e shëndetshme mund të jetë sfidë e madhe. Buka, një nga ushqimet më të vjetra dhe më të përdorura, shpesh është në qendër të debateve për ushqimin.

Me kaq shumë lloje të ndryshme të bukës që shiten në supermarkete e nëpër furra të bukës, “Womens Health Magazine” ka shkruar se cilat janë bukët më të shëndetshme.

Sipas dietologes Donna Peters, jo të gjitha bukët janë të njëjta. Shumica e bukëve që gjenden në supermarkete janë të përpunuara shumë dhe përmbajnë kripë, sheqer dhe konservans, të cilat kanë pak vlera ushqyese. Studimet kanë lidhur konsumimin e këtyre bukëve me probleme shëndetësore si diabeti, shëndeti i dobët i zorrëve, madje dhe me kancerin.

Ndërsa buka nga supermarketi është shumë e lehtë për t’u blerë, ajo nuk është gjithmonë opsioni më i mirë për trupin.
Nga ana tjetër, buka origjinale apo autentike, si buka me brumë të fermentuar, buka me fara liri e buka me grurë, janë më të pasura me lëndë ushqyese dhe janë më pak të përpunuara, duke ofruar më shumë përfitime shëndetësore.

Buka e bardhë
Buka e bardhë, e bërë nga mielli i rafinuar, është e varfër në lëndë ushqyese si fibrat dhe shpesh përmban sheqer të shtuar, kripë dhe konservans. Kjo mund të shkaktojë rritje të niveleve të sheqerit në gjak, e që mund të ndikojë negativisht në energji, humor dhe në menaxhimin e peshës trupore.
Peters ka shpjeguar se buka e bardhë ka vetëm rreth 0.6g fibra në një fetë, ndërsa rekomandohet që njerëzit të konsumojnë 30 gramë fibra në ditë.

Buka nga gruri
Buka e bërë 100% nga gruri është bërë nga të tria komponentët përbërës origjinalë të grurit, duke ruajtur më shumë lëndët ushqyese.
Kjo është një zgjedhje më e shëndetshme se buka e bardhë për shkak të përmbajtjes më të madhe të fibrave (rreth 2g për fetë).

Peters ka theksuar se fibrat mbështesin shëndetin e zorrëve, të cilat janë thelbësore për shëndetin e njeriut, pasi 80% e sistemit imunitar është në zorrë.
Dietologia Kayla Daniels ka thënë se buka nga gruri ofron energji të qëndrueshme dhe përmirëson tretjen. Përfitimet më të mira vijnë nga buka e bërë 100% nga gruri.

Buka e thekrës
Buka e thekrës është e pasur me vitamina të grupit B, fibra dhe lignanë, përbërës bimorë që lidhen me uljen e rrezikut për sëmundje të zemrës, osteoporozë dhe kancer të gjirit.
Peters ka sugjeruar që të zgjidhet buka e thekrës, pasi është më pak e përpunuar dhe ka më shumë lëndë ushqyese. Buka e thekrës gjithashtu ka indeks të ulët glikemik, gjë që është opsion i mirë për ata që duan të menaxhojnë nivelet e sheqerit në gjak.

Buka me fara liri
Buka me fara liri edhe pse më pak e zakonshme, është opsion shumë ushqyes. Ajo është e pasur me fibra dhe acide yndyrore omega-3, të cilat janë të dobishme për shëndetin e zorrëve dhe zemrës. Peters rekomandon të zgjidhet buka me fara liri që këto fara i ka si përbërësin kryesor, pasi ato sigurojnë përmbajtje më të lartë fibrash.

Buka me fara të shtypura
Buka me fara të shtypura, që shpesh mund të gjendet në dyqanet e ushqimeve organike, është më e lehtë për t’u tretur dhe ofron profil më të lartë ushqyes. Ajo është bërë nga fara të shtypura dhe zakonisht është më e pasur me proteina dhe fibra, ka më pak karbohidrate dhe indeks glikemik më të ulët.

A është buka me brumë të fermentuar më e shëndetshme?
Buka me brumë të fermentuar është e veçantë për shkak të mënyrës së saj të prodhimit, ku përdoren maja dhe baktere të acidit laktik. Ky proces i fermentimit e bën bukën të pasur me lëndë ushqyese dhe më të lehtë për t’u tretur.

Peters ka theksuar se buka me brumë të fermentuar është mundësi e shkëlqyer për ata që kanë probleme me tretjen kur konsumojnë bukë tradicionale.
Daniels ka treguar se procesi i fermentimit rrit sasinë e mineraleve si hekuri dhe zinku dhe ndihmon në stabilizimin e niveleve të sheqerit në gjak.

Megjithatë, jo të gjitha bukët me brumë të fermentuar janë të njëjta. Daniels ka theksuar se duhet kontrolluar prodhuesin, pasi disa “bukë me tharm” që prodhohen në masë mund të mos ofrojnë të njëjtat përfitime.

A është buka nga supermarketet e dëmshme për shëndetin?
Buka që prodhohet në masë dhe shitet në supermarkete shpesh përmban sheqer të shtuar, kripë dhe përbërës të tjera artificiale.

Peters ka thënë se buka nga supermarketet shpesh bie në kategorinë e ushqimeve të shumëpërpunuara dhe nuk është zgjedhja më e shëndetshme.
Megjithatë, Daniels ka theksuar se bukët e grurit tërësisht pa sheqer të shtuar dhe pa përbërës artificialë janë opsione të mira.

Duke pasur parasysh që disa lloje bukësh janë me më shumë vlera ushqyese se të tjerat, Peters sugjeron që të zgjidhet buka që është më pak e përpunuar dhe me sa më pak përbërës.
Ajo gjithashtu këshillon që të kontrollohet gjithmonë etiketa dhe, nëse është e mundur, të bëhen bukët në shtëpi me përbërës cilësorë ose të blihen nga një furrë me reputacion.

/koha.net