Zvicër: A do ta marrin gjysmë milioni të huaj lejen zvicerane ‘C’ pa kushte ?

Aktualisht, shtetasit e BE/EFTA mund të punojnë lirisht në Zvicër dhe zakonisht marrin lejen e qëndrimit B, e cila mund të shndërrohet në leje të përhershme C pas pesë vitesh pune. Ata që nuk punojnë mund të qëndrojnë vetëm nëse kanë mjete të mjaftueshme financiare. Ky sistem zbatohet që nga viti 2002.

Megjithatë, marrëveshjet e reja midis Zvicrës dhe BE-së, të arritura në dhjetor 2024, parashikojnë zgjerimin e lëvizjes së lirë të njerëzve. Kjo do t’u japë qytetarëve të BE/EFTA-s të drejtën për qëndrim të përhershëm pas pesë vitesh pa pasur nevojë për punë apo kushte të tjera.

SVP kundërshton ashpër këtë ndryshim, duke paralajmëruar se do të rrisë ndjeshëm numrin e emigrantëve dhe se shumë përfitues mund të jenë të papunë ose me ndihmë sociale. Sipas një studimi të Ecoplan, rreth 570,000 persona do të fitojnë automatikisht të drejtën e qëndrimit të përhershëm pesë vjet pas hyrjes në fuqi të marrëveshjes, me 50–70 mijë të rinj çdo vit.

Megjithatë, ndryshimet nuk do të hyjnë menjëherë në fuqi, pasi marrëveshjet e reja do t’i nënshtrohen referendumit. Ndërkohë, SVP po përgatit iniciativën “Jo Zvicrës së 10 milionë njerëzve”, që synon kufizimin e imigracionit kur popullsia të arrijë 9.5 milionë.

/albinfo