Kërçovarët vëlla e motër që luajnë futboll në Zvicër
Në Zvicër një numër i madh i shqiptarëve merren me futboll dhe po lënë gjurmë, madje, disa kanë lënë gjurmë të pashlyeshme në futbollin zviceran, si Xherdan Shaqiri, Admir Mehmedi, Valon Behrami apo vëllezërit Granit dhe Taulant Xhaka.
Këtyre hapave po shkojnë edhe vëlla e motër, Dardan dhe Albina Ajroja. Ata janë me prejardhje nga Kërçova, derisa kanë lindur në Biel Bienne, shkruan albinfo.ch.
Albian luan për SV Safern në ligën e katërt, derisa Dardani për FC Biel Bienne U-14.
Dardani ka filluar të merret me futboll që nga mosha 5-vjeçare dhe ka fituar shumë trofe deri më tani. Ai luan si mesfushor dhe si sulmues, derisa është i mirë me të dyja këmbët, duke shënuar shumë gola.
Ai për albinfo.ch shprehet se dëshiron të bëhet si Xhaka ose Shaqiri, derisa ka pasur fatin që të takohet me yjet shqiptarë, kurse skuadra që e ëndërron është Milan.
Albina Ajroja (18) duke e shikuar vëllain e saj, filloi të merret me futboll, ku tani luan në Ligën e Katërt. Ajo luan si anësore e majtë dhe e djathtë, derisa gjithashtu dallohet duke shënuar shumë gola.
Albina gjithashtu është duke e vazhduar shkollën si arkitekte, por, nuk e lë anash as futbollin. Ajo thotë se nëse do të arrinte një ftesë nga Zvicra ose Shqipëria, do të zgjidhte Shqipërinë, kurse Dardani thotë se ende ka shumë punë për të luajtur në kombëtare.
Edhe pse të lindur në Zvicër, ata nuk e harrojnë prejardhjen dhe e vizitojnë Kërçovën çdo vit.
/albinfo
