Prokuroria ende pa ekspertizë për Drin Ahmetin..!
Gati dy muaj pas arrestimit të Drin Ahmetit mbi dyshimet për tregti ilegale me mjete piroteknike, Prokuroria Publike akoma nuk ka dalë me konstatimin e ekspertizës të cilën e kishte nisur në fillim të muajit janar. Organi akuzës akoma është duke bërë vlerësimin e mjeteve të konfiskuara nëse janë mjete piroteknike ose jo, praktikë e pa aplikuar më parë nga organet ligj zbatuese posaçërisht në procedurat urgjente ndaj shitësve dhe tregtarëve ilegal në shtet.
Prokuroria Publike ditë më parë njoftoi shkurt se akoma nuk ka rezultate nga ekspertiza duke mos ndarë më shumë hollësi. Nipi i kreut të BDI-së, Ali Ahmetit, Drin Ahmeti nuk i është nënshtruar as masave të kujdesit, ndërsa në një prononcim të shkurtës që ka pasur paraprakisht për media kishte deklaruar se mjetet piroteknike i ka pasur për nipërit dhe mbesat e tij dhe se të njëjtat janë blerë në rrugë ligjore.
Çuditërisht organi akuzës nuk e ka marrë për bazë këtë deklaratë të Ahmetit i cili përmes fjalës publike pranon se janë mjete piroteknike dhe më këtë të konstatonte dhe vërtetonte veprën e mundshme penale ndaj tij, apo thjeshtë gjobën me të cilën mund të obligohet ai.
Drin Ahmeti apo ndryshe i njohur si bashkëpronar i QT “Soravia” mbrëmjen e 30 dhjetorit 2023 përfundoi në pranga si rezultat i posedimit të mjeteve piroteknike. Sasia që sipas fotografisë të cilën e ka publikuar policia jo zyrtarisht rezulton deri 750 copa, vlera e të cilave arrijnë në disa mijëra euro. Mjetet janë gjetur në veturën e tij të llojit Range Rover me targa të Shqipërisë e cila nga njësitet policore është ndaluar pak metra poshtë objektit të Ambasadës Amerikane, rrugës që çon drejtë Kalasë së Shkupit.
/Alsat.mk
