Osmani kandidat i BDI-së për president..!
Kryetari i BDI-së, Ali Ahmeti shpalosi emrin e Bujar Osmanit si kandidat për president.
Sipas tij, Osmani është kandidati i duhur për të përfaqësuar subjektin e tij në këtë garë zgjedhore duke shtuar se ideja e tij është që me hapjen e ndryshimeve kushtetuese, presidenti të zgjidhet në Kuvend me 2/3 e votave dhe Badinter, ndërsa në të njëjtën kohë të ketë edhe zëvendës president të shtetit, shkruan Alsat.
“Bujari ka dëshmuar vetën në skenën vendore dhe ndërkombëtare dhe ka ngadhënjyer në betejën kundër Rusisë si dhe ka qenë pjesë e ekipit tonë për ndryshimin e Kushtetutës, anëtarësimin në NATO dhe nisjen e negociatave për anëtarësim në BE. Me Bujarin po e nisim referendumin më të rëndësishëm dhe betejën e kohës për ta fituar besimin tuaj që ta zgjedhim në Kuvend me shumicë të 2/3 të votave dhe me Badinter për të realizuar vizionin tonë për president konsensual”, tha Ali Ahmeti, Kryetar i BDI-së.
Para Ahmetit, idenë për zgjedhjen e presidentit në Kuvend e shpalosi edhe kreu i Aleancës për Shqiptarët, Arben Taravari. Ai i bëri thirrje shqiptarëve dhe BDI-së që të mbështesin kandidaturën e tij dhe kërkesën që njëri nga tre postet e rëndësishme në shtet, të bëhet praktikë që t’i takon shqiptarëve.
“Synojmë që në hapjen e ardhshme të Kushtetutës të përfshihen tre elemente: futja e pakicës bullgare dhe pakicave tjera, heqjen e 20% që definon gjuhën shqipe dhe zgjedhjen e presidentit ta bëj Kuvendi dhe jo përmes zgjedhjeve. Ky është një lajm i rëndësishëm. Në këtë mënyrë në të ardhmen, forcat politike që përfaqësojnë dy kombet më të madha do të vendosin e bashkë në Kuvend për shpërndarjen e tre posteve më të larta shtetërore”, u shpreh Arben Taravari, Kryetar i ASH-së.
Nga vendet e rajonit, për momentin zgjedhja e presidentit në Kuvend bëhet në Shqipëri me 3/5 e votave nga numri i përgjithshëm i deputetëve duke kaluar në 5 filtra, si dhe në Kosovë përmes 3 filtrave duke filluar nga 2/3 e votave deri në shumicë të thjeshtë.
Kosova dështimin e zgjedhjes së presidentit e ka të lidhur me shpërndarjen e Kuvendit që nënkupton se mos zgjedhja e kreut të shtetit shpërndan Kuvendin dhe bie Qeveria.
/ Alsat.mk
