Afaristi Kërçovar nga Zvicra takim me presidetin e Maqedonisë (FOTO)
Takimi im me Presidentin e Republikës së Maqedonisë së Veriut, Stevo Pendarovski, Ambasadorin Rexhep Demiri dhe Diplomatin Burim Bilalli ishte një ngjarje mjaft e rëndësishme dhe frytdhënëse. Para së gjithash, dëshiroj të shpreh një faleminderim publik ndaj Ambasadës për mundësinë e ofruar për këtë takim dhe për organizimin e ngjarjes. Ndërsa lëvdatat më të thella i adresoj këtyre personaliteteve të larta, të cilët me nder dhe dinjitet përfaqësojnë vendin tonë edhe përtej kufijve.
Ky takim u zhvillua me një qëllim të caktuar, pasi Presidenti, në përgjigje të ftesës sime, tregoi një interes të veçantë për të njohur më shumë rreth veprimtarisë sime në vendlindje dhe në shkallë ndërkombëtare. Ishte një përvojë e jashtëzakonshme të dëgjoja përkrahjen dhe mirënjohjen e tij për projektet e mia, sidomos për ndihmën që Restorant Dardania ofron përmes bursave për nxënësit dhe studentët.
Në këtë takim, një pjesë e rëndësishme e bisedës u kushtua edhe investimeve në zonën industriale, duke pasur parasysh nevojat dhe sfidat që ka Maqedonia.
Gjatë diskutimit rreth investimeve dhe progresit të vendit, ne u fokusuam në rolin e rëndësishëm të rinisë. Me kënaqësinë më të madhe presidentit i shfaqa entuziazëm për një kompani orash, e drejtuar nga një kërçovar, kompania Oradora.
Presidenti me entuziazëm shprehu mbështetjen e tij për një zhvillim të mëtejshëm dhe inovativ në këtë drejtim.
Në këtë kontekst, është e rëndësishme për të thelluar bashkëpunimin dhe të inkurajuar mërgimtarët tanë të investojnë në vendin e tyre të origjinës.
Në përfundim, ky takim ishte një hap i rëndësishëm për të rregulluar më shumë lidhjet dhe bashkëpunimin mes vendeve tona. Nëse secili prej nesh, me potencialin dhe mundësitë e veta, kontribuon në zhvillimin e Maqedonisë së Veriut, jemi në rrugën e duhur drejt një të ardhme më të mirë për të gjithë.
Thirrja ime është për të gjithë mërgimtarët që të angazhohen në projekte dhe investime që do të sjellin përparim dhe prosperitet në vendin tonë të dashur.
Shkruan Afaristi Kërçovar nga Zvicra Kastriot Iseini në facebook duke publikuar edhe foto.
FOTO:
/kercova.net
