Të gjithë ne jemi politika..! Nga Dr.prof Arbër Çeliku

Gjithandej po dëgjoj:
Është degraduar arsimi, fajin e ka politika.
Është degraduar shëndetësia, fajin e ka politika.

Është degraduar ekonomia, fajin e ka politika.
Është degraduar shoqëria, fajin e ka politika.
Na ikin fëmijët, fajin e ka politika.

Gati gjysma e popullsisë po konsumon duhan, fajin e ka politika.
Droga ka hyrë thuajse në çdo shtëpi tonën, fajin e ka politika.
Gati çdo i treti luan bixhoz e kumar, fajin e ka politika.

Njerëzit duan rrogë dhe të mos shkojnë në punë, fajin e ka politika.
Diplomojnë të rinjtë pa dije e me intervenime, fajin e ka politika.
Ne jemi vendi më i korruptuar në botë, fajin e ka politika.

Ne jemi popull me vetëdije të ulët të dinjitetit dhe integritetit kombëtar, fajin e ka politika, etj.etj.
Edhe unë e them me plot gojën, se politika e ka fajin, se ajo inicoi dhe krijoi këtë sistem të përmbysur vlerash në perceptimin kolektiv.

Megjithatë, kush po e mban gjallë këtë politikë dhe këtë sistem të përmbysur vlerash, shtrohet pyetja. Ku jemi ne në gjithë këtë mesele?!
Ku mbeti ndërgjegjja e arsimtarit, mjekut,, afaristit, hoxhës, bujkut, punëtorit, gjykatësit, prokurorit, profesorit, votuesit?

Ne jemi ata që i formësojmë politikat. Ne jemi ata që hedhim gurin dhe fshehim dorën. Ne jemi ata që ia bëjmë varrin tjetrit. Ne jemi ata që tradhtuan fëmijët tanë dhe i përzumë nga shtëpitë e tyre. Ne jemi ata që e korruptojmë sistemin, për një vend pune, për interes personal. Ne jemi ata që njofsinë, intervenimin dhe korrupsionin i kemi kthyer në institucion.

Ne jemi ata, që ia rrahim shpinën dhe e ngremë në qiell një abdall.
Ne jemi ata, që të zezës i themi e bardhë.
Pra, të gjithë ne jemi politika…

/ms