Berberët në Zvicër do të marrin rroga dukshëm më të larta, ja si do të jenë..?

Pagat në sektorin e parukerisë do të rriten deri në 700 franga në muaj gjatë katër viteve të ardhshme. Kjo korrespondon me një rritje deri në një të pestën. Gjithashtu, leja e atësisë do të rritet në 13 ditë me pagesë të plotë, përcjell albinfo.ch.

Nga viti i ardhshëm do të ketë më shumë paga në fushën e parukerisë. Paga minimale do të rritet me 440 franga në muaj për punonjësit e kualifikuar që kanë kryer një stazh praktik, njoftoi të premten sindikata Syna.

Kjo korrespondon me 5280 franga në vit (rritje). Gjysmë të kualifikuarit me certifikatë profesionale pas një praktike dyvjeçare marrin 340 franga më shumë në muaj dhe personat e pakualifikuar marrin 420 franga më shumë në muaj.

Kujtojmë se paga mesatare e frizerëve që punojnë në sallone në Zvicër është rreth 4 mijë franga.
Marrëveshja kolektive e punës për sektorin e parukerisë e rinovuar nga sindikata Syna hyn në fuqi më 1 janar 2024 dhe është e vlefshme deri në vitin 2027. Ajo prek rreth 11,000 punonjës në 4,232 sallone flokësh në gjithë Zvicrën.

/ albinfo.ch