Zajaz, filluan punimet për ndërtimin e kanalizimit..

Pas ngecjeve disa vjeçare që u shkaktuan nga pengesa të ndryshme në procedurën e tenderimit, filloi realizimi i projektit të kanalizimit në vendbanimet e rajonit të Zajazit që financohet nga BE dhe kap shumën prej afro 16 milion eurosh. Realizimi i këtij projekti është tepër i rëndësishëm për cilësinë e jetës dhe ai vjen si rezultat i angazhimit të vazhdueshëm të komunës, e cila ka dëshmuar një profesionalizëm të lartë në fushën e mjedisit jetësor duke arritur të realizojë projekte ekologjike me mjete të Bankës Botërore, Bankës Evropiane, dhe tani edhe me fondet e BE IPA 1 dhe IPA 2, thotë kreu i Kërçovës Fatmir Dehari.

“Tanimë fillojmë një ditë të mbarë të tetorit me plot diell dhe ky diell shpresojmë ti ngrohë të gjithë ato qytetarë që kanë pritur për vite me radhë një projekt kaq të rëndësishëm për cilësinë e jetës së tyre dhe për një ambient më të pastër, edhe pse ne si komunë në vitet që lejmë pas, në fushën e mjedisit kemi mjaft rezultate, dhe një nga ato është ndërtimi i stacionit filtrues për ujrat e zezë, i realizuar me mjetet e BE, si komunë e rrallë jo vetëm në Maqedoni, por edhe brenda rajonit.

Por megjithatë kemi pasur edhe ngecje në rrjetin sekondar, pra në rajonin e ish komunës së Zajazit, janë disa fshatra që pjesërisht ne si komunë i kemi kryer, por jo në tërësi. Fatmirësisht komuna jonë ka dëshmuar një disciplinë të jashtëzakonshme dhe një profesionalizëm të lartë të administratës, e cila ka arritur të shfrytëzojë mjetet nga Banka Botërore, Banka Evropiane për Zhvillim, e në veçanti nga IPA fondet 1 dhe 2.

E kam theksuar për disa vite me radhë, kemi siguruar rreth 16 milion euro për realizimin e kanalizimit të ujrave të zezë që përfshijnë mbi 100 kilometra të rrjetit në Zajaz, Greshnicë, Drogomisht i Vogël, Drogomisht i Madh, Llaxhe, Kolibar në drejtim të qytetit, fshatrat Sërbjan dhe Dërgovë, pastaj lidhjen e gjithë këtyre në një kolektor që do të përfshijë edhe Cërvicën, Garanën, Shutovën, Premkën, Mafmutajt, poashtu në drejtim të kolektorit pastrues.”, tha kryetari i komunës së Kërçovës, Fatmir Dehari.

Administrata komunale, shton ai, ka qenë tejet e përkushtuar për realizimin e këtij projekti, por për fat të keq gjatë këtij procesi ka pasur pengesa që lidhen me faktorë të ndryshëm, por edhe ndërhyrje individësh që i shkaktuan vonesat e një projekti kaq të rëndësishëm për komunën e Kërçovës, si një detyrim dhe obligim parësor ndaj qytetarëve, të cilët, siç shprehet ai, e kanë dhënë mbështetjen e tyre për 20 vite me radhë.

“Dua të pranoj faktin e vonesave, një gjë që qytetarët duhet ta dijnë, se komuna jonë në aspektin administrativ dhe procedurial ka arritur të kryej detyrat e saj në kohë të caktuar, dhe dëshmi e gjithë kësaj është fillimi i realizimit të këtij projekti. Pengesat kanë qenë nga më të ndryshmet. Fatkeqsisht, ndërhyrja e shumë faktorëve të jashtëm, lobi i “tenderashëve” nga më të ndryshmit, qofshin vendor apo lokal, kanë pamundësuar që ky projekt të fillojë të realizohet me kohë.

Kjo komunë, kjo administratë komunale, të gjithë ne, kemi merituar fillimin e realizimit të këtij projekti, por në veçanti, dhe detyrim i joni ka qenë përballë qytetarëve, por fatkeqsisisht, le të dëgjojnë të gjithë ato që kanë ndërhyrë, qofshin familjarë, qofshin të afërm të dikujt, le të dijnë se kanë prekur një detyrim dhe një obligim të madh që e kemi ndaj qytetarëve, kanë vonuar pra realizimin e një projekti që ka të bëjë drejtëpërsëdrejti me jetën e qytetarit, pra qytetarë të cilët na kanë besuar për 20 vite me radhë, qoftë në pushtetin qëndrorë apo në atë lokal.”, potencon kreu i Kërçovës Fatmir Dehari.
Punimet kanë filluar në tri njësitë e këtij projekti dhe sipas dinamikës së planifikuar ky projekt do të përfundojë brenda periudhës tre vjeçare.

VIDEO:

/https://al.mrt.com.