Me ndryshimet e Kodit Penal u ulet dënimi edhe pedofilëve?! Përplasen Sali dhe Lloga..!

Ndryshimet e Kodit Penal kanë qenë moll sherri edhe gjatë ditës së sotme. Ishte Bekim Sali nga Alternativa që kritikoi pushtetin aktual – LSDM, BDI dhe ASh duke e cilësuar si “ultra të pamoralshëm”.
Kjo sipas Salit ndodh pasi me ndryshimet e Kodit Penal parashihet që të ulen dënimet edhe për pedofilët – abuzuesit e fëmijëve, transmeton TV21.

“Në një botë ku drejtësia duhet të mbizotërojë, është dëshpëruese të konstatosh amoralitetin politik të pushtetit. Sot, ne një zëshëm jemi kundër njollës së errët mbi të drejtat e njeriut, që ky koalicion qeveritar , LSDM, BDI dhe ASH, pa pikë turpi e morali e bën me çmenduri. Ulja e dënimeve për ata që dëmtojnë më të pambrojturit mes nesh, fëmijët, është një tradhti e vetë drejtësisë. Një pushtet i tillë politikisht vetëm mund të quhet ultra i pamoralshëm. Kjo nuk ju kalon dhe përgjegjësi për këtë do të jipni!”, shkroi mes tjerash Sali.

I reagoi ministri i Drejtësisë nga radhët e Aleancës për Shqiptarët, Krenar Lloga. Nëpërmjet një shkrimi në Facebook, Lloga publikoi dokumente ku pretendon se ishte pikërisht partia e Salit, Alternativa në Qeveri kur u propozuan ndryshimet e Kodit Penal. Ndërkaq shton se të njëjtat u votuan në lexim të parë edhe nga ish deputeti i BDI-së, tash lideri i partisë opozitare Lëvizja Demokratike – Izet Mexhiti, deputetit në atë kohë pjesë e Besës në Qeveri, tani në LD, Kastriot Rexhepi, deputetit të Besës, Fadil Zendeli dhe deputetit të Alternativës, Hysni Ismaili.

“Është mëkat i madh njerëzor por edhe politik, biles ështe për të ardhur keq kur “turpin” e juaj u mveshni të tjerëve. Ligji në fjalë është propozuar në 2021 kur në Qeveri ka qenë Levizja Besa me Izet Mexhitin dhe ka vazhduar përsëri me Izet Mexhitin dhe me Alternativën përsëri në Qeveri 2022/2023 dhe është votuar në Kuvend në kohën kur unë nuk kam udhëheq me Ministrinë e Drejtësisë.

Në lexim të parë arritëm të gjejm materialet se kanë votuar PËR: Izet Mexhiti, Kastriot Rexhepi, Fadil Zendeli, Hysni Ismaili etj. Me përgjegjsin me të lartë morale, penale dhe materiale demantoj pretendimet e juaja dhe se gjysëm e verteta nuk i bën nder askujt, përkundrazi dëmton të vërtetën. Ngritja e këtyre temave nga amator partiak në studio televizive pa marrë qëndrime të ekspertëve të fushës jovetëm se e dëmton kauzën dhe luftën kundër pedofilisë por i sjellë huti dhe pasiguri opinionit të gjërë”, shkroi Lloga.
Në vijim fotografitë e dokumenteve të publikuara nga Lloga.

/TV21