Bekteshi: Qytetarët të jenë të qetë, të respektohen masat..

“Qytetarët duhet të jenë të qetë. Masat e ndërmarra nga Qeveria për mbrojtjen e standardit të qytetarëve do të realizohen në tërësi. Në seancën e ardhshme të Qeverisë do të merret vendim për uljen e çmimeve të pijeve alkoolike dhe joalkoolike, po ashtu po bëhet analizë për uljen e çmimeve të produkteve higjienike”, tha ministri i Ekonomisë Kreshnik Bekteshi gjatë vizitës së sotme në kompaninë “Alma M”, një kompani nga biznesi i distribucionit, e cila shpërndan produkte në tregjet e mbuluara nga masa e “çmimit të garantuar”.

Ministri Bekteshi, i cili ishte në vizitë në “Alma M” së bashku me kryeministrin Dimitar Kovaçevski dhe drejtorin e Inspektoratit Shtetëror të Tregut, Goran Trajkovski, tha se kompanitë kanë afat që të respektojnë vendimet e reja dhe zgjidhjet e reja ligjore që duhet të respektohen nga të gjithë tregtarët.

“Ne kemi një zgjidhje të re ligjore në seksionin Mbrojtja e Konsumatorit dhe me kërkesë të Odës Ekonomike u kemi dhënë kompanive një afat të caktuar që të respektojnë kërkesat e ndryshuara të Ligjit. Kjo zgjidhje ligjore zbatohet plotësisht në vendet më të zhvilluara evropiane dhe duhet respektuar plotësisht. Për vendimin që kemi marrë tashmë, ajo që dimë me siguri është se nesër do të vendoset për uljen e çmimeve të pijeve joalkoolike dhe alkoolike.

Sa i përket produkteve të higjienës, të gjitha konsultimet me gjasë do të përfundojnë gjatë kësaj jave dhe do të shohim nëse ka hapësirë për marrjen e masave të caktuara”, tha ministri Bekteshi.

Bekteshi theksoi se Ministria e Ekonomisë dhe të gjitha institucionet kompetente bëjnë analiza në baza javore dhe në bazë të të gjitha të dhënave hyrëse do të merren vendime që do të jenë në interes të mbrojtjes së standardit të qytetarëve.

/ ts