Dr. Gjyla Çeliku e piklluar për vdekjen e Prof.Dr. Nazmi Maliqit

E dhimbshme qenka të shkruash për njeriun që e do si familjarin tënd shumë të afërt dhe akoma më e dhimbshme që nuk do mund më ta takosh, të dëgjosh këshillat e tij e të vazhdosh duke marrur shembullin e tij.
Sot shkruaj me lotin në sy sepse fizikisht nuk jeni më i dashur profesor, por do vazhdoj sepse ju më thonit “Të Zotit jemi” edhe atëherë kur më njoftuat për sëmundjen tuaj.

Iku në botën tjetër me vepra nderi, shkencore, politike dhe atdhedashurie, profesori i nderuar, njeriu zemërbardhë me plot mirësi e respekt për të gjithë Prof.Dr. Nazmi Maliqi
Isha studente kur filloi bashkëpunimi jonë dhe vazhdoi në mbrojtjen e tezës së doktoratës time në Tiranë që e kisha mentorin e dytë nga Maqedonia e Veriut e deri sot kur më nuk merr frymë por vazhdon vepra dhe mirësia të na ndjekin pas.

Gjithashtu është recesent edhe në librin tim të publikuar “Politikat ndërkombëtare për shtetet multietnike, rasti i Maqedonisë”.
Karriera e tij filloi në gjimnazin e Kumanovës pas diplomimin 1981 dhe vazhdon deri 1987 ku edhe u përjashtuan me disa profesorë të tjerë nga pushteti i atëhershëm sepse kërkonte mësim dhe edukim në gjuhën shqipe.
Pas këtij diskriminimi dhe përjashtimi profesori i nderuar u detyrua të marrë rrugëtim në migrim në Austri nga 1988-1993.

Me kthimin e tij nga Austria fillon aktiviteti i tij politik dhe është njëri ndër themeluesit e PPD-së me kandidaturë për deputet në shfaqjen e PPD-së në zgjedhjet e para.
Prill 1993 emërohet Zv.Ministër i Mbrojtjes në Qeverinë e Maqedonisë deri më 1994.
1994-1998 u zgjodh deputet në Maqedoni nga radhët e PPD-së në zonën e Karshiakës në Shkup, ku edhe sot e kësaj dite ka respekt sepse nuk ngeli njëri që nuk ndihmoi.
1996-1998 ishte deputet në Asamblenë Parlamentare të NATO-s si përfaqësues i delegacionit parlamentar të RM-së.

Në Kongresin e PPD-së u 1999 u zgjodh nënkryetar i PPD-së dhe vazhdon deri në vitin 2000 dhe nga viti 2001 pushon angazhimi i tij politik me nder, faqebardhë dhe kontribues si intelektual i pavarur.
Është shembull që politika nuk të njollos nëse ti nuk e ke profesion njollosjen dhe sahanlëpirjen, shitjen e blerjen, biznesin politik dhe shpifjen, dmth profesori dëshmon që MUND TË JESH I NDERSHËM NË POLITIKË, ndaj dhe më la amanet që të vazhdoj me rrugëtimin që kam.

Politikën e njollosin njerëzit, Jo politika ata.
Nga viti 2001 fokusohet në angazhimin akademik dhe nga 2002 profesori punësohet në Universitetin e Evropës Juglindore në cilësinë e ligjeruesit, pastaj vazhdon edhe në disa institute universitare. Bashkëpuntor i jashtëm edhe në Universitetin Shtetëror “Shën Kiril dhe Metodij” në Fakultetin Filozofik në Institutin për Studime mbi Paqen.
Prorektor në Universitetin Amerikan FON, bashkëpuntor i jashtëm në disa universitete në Kosovë e Shqipëri dhe jeta e tij përfundoi si intelektual i pavarur, kritikues kur e kërkonte nevoja dhe faqebardhë.
Botoi disa libra.

Kryeredaktor i revistës “Vizione” për shkencat shoqërore që botohej në Shkup nga viti 2004.
Nga janari 2003 ishte kryetar i OJQ-së” Unioni i Intelegjencës Shqiptare në Maqedonin”.
Pjesmarrës në shumë konferenca ndërkombëtare dhe në vend me punime të cilat na kanë shërbyer dhe do ju shërbejnë në vazhdimësi gjeneratave.
Dëshira e tij për një shtet ku do sundojë DREJTËSIA dhe BARAZIA do vazhdojë me ne dhe është gjithashtu njëri ndër themeluesit dhe këshilltari im edhe i partisë tonë.
Shëndeti dy vitet e fundit e rëndoi dhe largoi nga aktivitetet e ndryshme, por me shpirt çdo herë ka qenë me ne!

Shpirti i tij ishte shumë human dhe i pastër.
Profesori ishte edhe shumë besimtar që me format e tij të mirësisë të promovonte edhe fenë myslimane, me vepra fetare, humane dhe morale.
Kam edhe shumë për të thënë, por do më duhen ditë të tëra sepse ishte enciklopedi në vetë, mirësi në vete dhe humanizëm i dëshmuar.

Një reflektim i profesorit për të vazhduar misionin tonë:
“KRIJIMI I POLITIKAVE PËR NDRYSHIME POZITIVE
Politika e udhëhequr nga “demokratët politikë” krijon një fushë të barabartë për vlerat demokratike dhe një nivel më të lartë të të kuptuarit të nivelit të të drejtave civile. Qytetarët kanë një shkallë më të lartë të tolerancës kombëtare, konfesionale, kulturore dhe rrisim nivelin e “tolerancës politike”. Në rrethana të tilla, marrëdhëniet krijohen për krijimin e një ambienti të përshtatshëm politik, me projekte konkerte, duke treguar aftësinë për të parë dhe kuptuar botën përmes qëndrimeve të të tjerëve, për të pranuar qëndrimet e të tjerëve sipas niveleve të ndryshme të arsimit.

Kjo presupozon që ofertat e politikanëve nuk mund të ofrojnë më vetëm aktorë vetëm për hir të paradigmës në skenën publike, por për të treguar elokuencë, për të treguar sjellje të mirë, për të treguar simpati, për të treguar aftësinë për të pranuar njerëz të tjerë, dhe veçanërisht për të pasur aftësinë për të mbështetur proceset për ndryshime pozitive në vend.

Qofsh banor i parajsës i nderuar profesor për besimin e pastër në Zot të dëshmuar në vepër për të mirën e KOMBIT dhe POPULLIT!
Ngushëllime zonjës së profesorit për të cilën profesori krenohej dhe hapur e thoshte që është arsyeja e suksesit dhe karrierës!
Ngushëllime fëmijëve të mrekullueshëm!

Ngushëllime të gjithë miqësisë dhe shqiptarisë!
Me shumë dhimbje dhe lot në sy,
Ish studentja juaj,
Dr. Gjyla Çeliku