BDI dhe LSDM sponsorues kryesorë të formimit të partive të reja politike shqiptare..!

Pavarësisht se çdo qytetarë i vendit, përfshirë edhe shqiptarët, gëzojnë të drejtën kushtetuese të formojë parti politike ose të angazhohen politikisht në ndonjë subjekt politik, në rrethanat aktuale nëpër të cilat kalon vendi, duket se formimi i subjekteve të reja , jo që është i dëmshëm por ekzistenca e shumë partive humb peshën politike dhe zbeh në ekstrem nivelin e faktorizimit të shqiptarëve në Maqedoninë e Veriut.

Historia e formimit të partive të reja në Maqedoni daton që nga përçarrja e PPD-së , në vitet e 90-ta dhe vazhdon edhe në ditët e sotme, me një hov më të theksuar.
Për dallim prej përçarrjes së dikurshme të PPD-së, ku si faktorë kryesor ishin pakënaqësitë e qytetarëve me politikat partiake të PPD-së, duke mos përjashtuar edhe pakënaqësitë dhe interesat personale të individëve të caktuar që janë ndarë me partinë – amë.

Përçarrjet e fundit janë kryesisht përçarrje të sponsorizuara, që i bëjnë subjektet e konsoliduara politike, si dhe shërbime intelegjente të shtetit, kryesisht për nevoja të përfitimit politik dhe zhdukjes dhe dobësimit të konkurrencës politike.
Të tilla janë edhe rastet e formimit të subjekteve të reja që tashmë kanë filluar aktivitetin politik në Maqedoni.

Për dallim nga Lëvizja Demokratike e Izet Mexhitit, e cila lindi si rezultat i natyrshëm i luftës së brendshme që për një kohë të gjatë u zhvillua në BDI dhe me të drejtë pas shterrjes së të gjitha mundësive për një pajtim të brendshëm, sidomos pas goditjeve të ulta që në vazhdimësi i vinin nga Artan Grubi, e detyruan Izet Mexhitn të formojë një parti të re politike .
E njëjta nuk mund të thuhet edhe për dy partitë e reja që dolën në skenë ditëve të fundit, Partinë Demokratike Europjane- PDE të Arjanit Hoxhës dhe Lëvizjen Populli të deputetit Skender Rexhepi- Zejd, që u promovua ditë më parë.Padyshim se si sponsorues kryesor të krijimit të këtyre dy partive, sado që mundohen të fshihen , janë dy partitë kryesore të shumicës aktuale BDI dhe LSDM.

Nisur nga disponimi qytetarë, si dhe duke iu referuar matjeve të shumta të opinioinit , ku numrat dhe mbështetja qytetare për partitë në pushtet lenë shumë për të dëshiruar, sidomos paralajmërimi tri subjekteve opozitare shqiptare për bashkërendim të aktiviteteve politike, si dhe paralajmërimi i formimt të bllokut opozitarë shqiptarë, ka vënë në siklet jo vetëm BDI- në , por edhe LSDM-në.

Natyrshëm nga frika e humbjes së pushtetit në zgjedhjet që pritet të mbahen së shpejti , ata janë alarmuar dhe kanë aktivizuar planin e thërmimit të partive shqiptare dhe krijimit të partive të reja, dukuri kjo që ka ndodhur edhe në ciklet e mëhershme zgjedhore.

Poashtu edhe paralajmërimet e z. Ali Ahmeti për formimin e të ashtuquajturit Fronti Europjan, janë një tregues i frikës që ka kapluar partinë e z. Ahmeti, prandaj investimi në krijimin e partive të reja, bëhet pikërisht për këtë qëllim, gjoja për tu dukur sa më i madh fronti që z Ali Ahmeti ka kohë që e promovon.

Padyshim se z. Ahmeti duke llogaritur në afërsinë që ka me individ të caktuar të ASH-së, që edhe e drejtojnë në hije këtë parti, në këtë Front e sheh edhe Aleancën për Shqiptarët, si dhe PDSH-në e Menduh Thaçit. Mirpo duke njohur votuesin e Aleancës për Shqiptarët , vështirë se ky kalkulim i tij do të realizohet, për vetë faktin se një votues i Aleancës, kurrë dhe për asnjë çmim nuk do të pranojë të hyjë me një list të përbashkët me Ali Ahmetin, e jo më të votoj për të , si bartës liste.

Sidoqoftë deri në caktimin e datës së mbajtjes së zgjedhjeve ka ende kohë dhe sigurisht se priten edhe zhvillime tjera interesante, sidomos skandale nga më të ndryshmet që për këtë qeveri janë bërë tashmë të përditshme.

/fol.mk