A mund ta përballojë Zvicra bumin e popullsisë..?

Popullsia zvicerane në vitin 2023 pritet të rritet shumë më tepër sesa parashikonin statistikat zyrtare, argumentojnë disa ekspertë të pasurive të paluajtshme. Kjo e bën vendin të papërgatitur për t’u përballur me një rritje të kërkesës për strehim, thonë ata. “Problemet fillojnë me faktin se parashikimet zyrtare të popullsisë janë vazhdimisht shumë të ulëta”, tha Hans Holdener, CEO i Helvetica Property Group.

Firma konsulente e pasurive të paluajtshme Wüest Partner parashikon se popullsia në Zvicër do të rritet me një rekord 148,000 në vitin 2023. Kjo është dukshëm më e lartë se rritja prej 70,000 njerëzve, e vlerësuar nga Zyra Federale e Statistikave (FSO) në skenarin e saj të referencës.

Në përgjigje të një kërkese të NZZ, zyra e statistikave tha se efektet e pandemisë Covid-19 dhe luftës në Ukrainë janë të vështira për t’u parashikuar.
Sipas modelit të firmës Wüest Partner, nxitësi kryesor i rritjes është tregu i punës. Ai parashikon imigrimin neto të 91,000 punëtorëve bazuar në një rritje prej 2% të punësimit, transmeton albinfo.ch.

Firma e pasurive të paluajtshme parashikon gjithashtu se rreth 48,000 njerëz nga Ukraina do t’i shtohen popullsisë rezidente. Pas 12 muajsh qëndrimi në Zvicër, personat me statusin e mbrojtjes S, ku përfshihen ukrainasit që ikën nga lufta, llogariten zyrtarisht si pjesë e popullsisë rezidente të përhershme të Zvicrës. Një tepricë lindjeje prej 8,000 personash gjithashtu kontribuon në një pjesë të vogël të rritjes, albinfo.ch.

Vitin e kaluar, popullsia e Zvicrës u rrit me 55,000 familje ose 74,000 njerëz për të arritur në rreth 8.8 milionë. Kjo shifër nuk përfshin refugjatët dhe azilkërkuesit.

Kriza e banesave
Ekspertët e pasurive të paluajtshme thonë se ndërtimi i banesave nuk po ec në hap me popullsinë. Bazuar në parashikimet e Wüest, do të duhej të krijoheshin rreth 90,000-100,000 apartamente shtesë.

Parashikimet e pasakta janë pjesërisht fajtorë. Në vitin 2010, zyra e statistikave parashikoi që Zvicra do të arrinte pragun e 8.9 milionë banorëve deri në vitin 2055, por vendi tashmë i ka eklipsuar këto parashikime. Holdener pret që Zvicra të arrijë shifrën prej 10 milionë në 10 vjet, jo deri në vitin 2040 siç parashikojnë zyrtarët.

“Kjo luan një rol vendimtar në faktin se ne po ndërtojmë shumë pak apartamente dhe ka mungesë”, tha Holdener, i cili shton se Zvicra rrezikon të bëhet Monako e re me qira jashtëzakonisht të larta dhe çmime të pasurive të paluajtshme.

Në Monako, apartamentet në një vend të mirë kushtojnë të paktën dy herë më shumë se apartamentet luksoze më ekskluzive në qytetet turistike zvicerane të St. Moritz ose Gstaad.
Ekspertët e pasurive të paluajtshme argumentojnë se Zvicra duhet të rrisë investimet dhe të përmirësojë kushtet, duke përfshirë ligjet e zonave, për të lejuar më shumë ndërtime.

/albinfo