Kërçovaë: Rruga e Krushinës mbi 5 vite në gjendje të njëjtë..! (VIDEO)

Kanë kaluar më shumë se pesë vjet, premtime të shumta u dhanë por rruga e cila të çon në qendrën rekreative Krushinë të Kërçovës vazhdon të mbetet në gjendjen e njëjtë, që kur kanë filluar punimet e autostradës Kërçovë-Ohër në këtë anë.

“Kjo rrugë e shkatërruar që e shihni në pamje është rruga e cila të çon drejt Krushinës, kjo rrugë është shkatërruar që kur ka filluar të ndërtohet autostrada, sidomos në pesë vitet e fundit kjo rrugë vazhdon të qëndroj e tillë, ndërsa vitin e fundit është gërryer edhe më shumë sepse këtu kalojnë edhe kamionët të cilët ndërtojnë autostradën.

Për këçovarët ky vend dikur ka qenë shumë i dëshiruar, ndërsa tanimë është i padëshiruar për shkak se për t’u ngjitur lart duhet të thithësh pluhur dhe të kalosh në një rrugë tërësisht të shkatërruar.”

Kur fillimisht TV21 raportoi për gjendjen e kësaj rruge, na thanë se kanë problem me inspektoratin e pyjeve dhe prerjen e drurëve, për një kohë të gjatë, të njëjtin problem e cekën edhe nga Ndërmarrja Publike “Rrugët shtetërore” duke thënë të njëjtën gjë, pas një kohe kur punimet nuk po zhvilloheshin në terren për rikonstruktimin e rrugës, i thanë TV21 se së shpejti do të fillojnë me riparim.

Sot nga kompania “Granit”, e cila po zhvillon punimet në këtë pjesë të autostradës, thonë se me rrugën në fjalë kanë pasur shumë probleme, fillimisht me Ndërmarrjen Pyjet e Maqedonisë, e tani me një person fizik që posedon tokë në këtë pjesë të vendit.

“Jemi duke bërë gjithçka që ta rregullojmë rrugën deri tek kisha lart dhe deri në fshatin Knezhin, por kemi hasur nga problem në problem, nuk është vetëm një problem. Rruga është e ngushtë mezi po kalojmë me kamionë, por sapo të kryhet eksplorimi dhe të zgjidhen disa probleme që janë shfaqur me një tokë private rrugën do ta rregullojmë tërësisht”- thonë nga kompania “GRANIT”.

Ndërtimi i autostradës Kërçovë-Ohër duhet të përfundojë së shpejti, në fund të këtij vitit, nëse respektohen të gjitha afatet kohore dhe ligjore. Me përfundimin e kësaj autostrade, pritet që të rregullohen edhe rrugët dhe rrugicat të cilat janë shfrytëzuar nga kompanitë që kanë zhvilluar punimet në autostradë.

VIDEO:

/tv21