Nis “beteja” në rrjet mes përkrahësve të Ali Ahmetit dhe Albin Kurtit..?!
Ardhja e Albin Kurtit të premten në Tetovë, si dhe paralajmërimi për takim me Izet Mexhitin dhe Bilall Kasamin, po ngjall betejë mes përkrahësve të Ali Ahmetit dhe Albin Kurtit në RMV.
Përkrahës të kreut të BDI-së Ali Ahmeti kanë nisur të hedhin foto të tij në rrjet, duke aluduar se Ahmeti është lideri i shqiptarëve të Maqedonisë së Veriut, si një ish udhëheqës i UÇK-së, ndërkohë nga ana tjetër, ata që po mirëpresin më me entuzjazëm ardhjen e Albin Kurtit, janë kryesisht përkrahës të Lëvizjes Demokratike të themeluar së fundi nga Izet Mexhiti, dalë si fraksion i BDI-së.
Kjo po shtron pyetjen nëse ardhja e Albin Kurtit është duke thelluar ndasitë mes politikbërësve në Maqedoninë e Veriut, por edhe elektoratit, aq më tepër kur është paralajmëruar takim i tij vetëm me keyetarin e Tetovës, Bilall Kasami, njëherit edhe kryetar i “Besës” si dhe me kryetarin e LD-së Izet Mexhiti – që të dy pjesë e frontit opozitar shqiptar.
Çështja tjetër që shtrohet pas kësaj është nëse kryetari i Vetëvendosjes, kryeministri i Kosovës, Albin Kurti po shtrin ndikimin e tij politik edhe në Maqedoninë e Veriut?!
Këto pyetje mbetet të marrin përgjigje të premten, nëse Kurti do të dëshirojë të flasë dhe t’u përgjigjet pyetjeve të gazetarëve.
/TV21
