Edhe Aleanca për Shqiptarët solidarizohet me Artan Grubin..!

Edhe Aleanca për Shqiptarët është solidarizuar me zëvendëskryeministrin Artan Grubi, pasi këtij të fundit i dogjën veturën mëngjesin e sotëm para banesës së tij në Çair. Nga ASH-ja thonë se ky është një akt vandal dhe i patolerueshëm, pasi veprime të tilla huliganeske nuk kanë vend në një vend dhe shoqëri demokratike.

Aleanca apelon te institucionet që sa më shpejt të zbardhin këtë rast dhe të zbulojnë autorët.
“Aleanca për Shqiptarët dënon ashpër aktin vandal dhe të patolerueshëm të djegies së veturës së zëvendës kryeministrit, Artan Grubi.

Veprimet e këtilla huliganeske janë të patolerueshme në një vend dhe shoqëri demokratike. Ju bëjmë thirje autoriteteve të rendit që sa më shpejtë të zbardhin rastin dhe të zbulojnë autorët.

Përtej dallimeve dhe mospajtimeve politike, të gjitha subjektet dhe institucionet duhet të dënojnë aktet e këtilla, ndërsa rendi dhe siguria duhet të garantohen për çdo qytetarë.

Kërcënimet dhe sulmet e këtilla vandale paraqesin rrezik për gjithë shoqërinë dhe si të tilla duhet të dënohen dhe luftohen nga të gjithë, pa dallim.”- thuhet në reagimin e ASH-së.

/tv21