Antikorrupsioni i kundërpërgjigjet Prokurorisë: “Nuk e keni parë nismën dhe thoni se është e panevojshme”..

Pas deklaratave të Prokurorisë për Ndjekjen e Krimit të Organizuar, reaguan nga Komisioni Antikorrupsion. Thonë se të dhënat që janë prezantuar në seancë, e cila është publike, tashmë janë të njohura për opinionit dhe Antikorrupsioni ka bërë një analizë dhe lidhje kronologjike të të njëjtave, përcjell TV21.

Nga Antikorrupsioni thonë se kanë vepruar në përputhje me nenin 17, paragrafi 1, pika 5, dhe kanë vendosur që të nisin Iniciativën për inicimin e procedurës për ndjekje penale për rastet që trajtojnë.

Në të njëjtën kohë, nga aty pyesin se si Prokuroria Publike ka vlerësuar se Nisma ishte e pakuptimtë dhe e pabazuar dhe se Komisioni gjatë analizimit të rastit nuk ka pasur para vetes prova të shumta apo pasqyrë të gjendjes së plotë faktike, kur ende nuk është dorëzuar Iniciativa, ndërsa Prokuroria Publike ende nuk di se çfarë materialesh kanë siguruar antikorrupsionerët gjatë analizës.

Nga Komisioni antikorrupsion thonë se në frymën e një lufte të përbashkët dhe të organizuar kundër korrupsionit dhe krimit të organizuar, Prokuroria Publike së pari duhet të shohë të gjitha faktet dhe argumentet që ka në dispozicion antikorrupsioni, sepse siç thonë ata, synimi i tyre është të kontribuojnë në zbardhjen e këtij rasti, dhe jo të komprometojnë procedurën që po zhvillohet në Prokurorinë Publike.

/tv21