Bllokohet hapësira ajrore! Liderët e vendeve të NATO-s vetëm 200 km larg Rusisë..!

Në orët e para të ditës së sotme, respektivisht pak pas mesnate, ekipi i TV21 ka mbërritur në Vilnius të Lituanisë. Avioni me të cilin udhëtoi ekipi ishte i fundit që kishte mundësinë të zbriste në këtë territor. Nga këto momente, për 26 orët e ardhshme hapësira ajrore do të jetë plotësisht e mbyllur, për avionë, dronë, balona me ajër të nxehtë dhe çdo objekt tjetër fluturues.

Në vend ka 12 sisteme raketore Patriot nga Gjermania, raketa balistike, raketa tjera, avionë ushtarakë, ndërkaq Spanja ka dorëzuar sistemin e saj të mbrojtjes ajrore. Finlanda dhe Danimarka kanë vendosur avionë kurse Britania po patrullon me dronë.

Në historinë 74-vjeçare të NATO-s, kjo është hera e parë që liderët janë kaq afër Rusisë. Vilnius është vetëm 200 kilometra nga kufiri me agresorin rus në Kaliningrad, ndërsa kufiri i Ukrainës, të cilin Rusia e sulmoi, është 360 kilometra larg.

Nëse diçka zbulohet në hapësirën ajrore, do të përgjohet nga pajisjet më të fundit që disa vende anëtare të NATO-s kanë sjellë në Lituani.

Kufiri i Bjellorusisë aleate të Rusisë është vetëm 35 kilometra larg.
Ndryshe, udhëheqësit e aleancës ushtarake të NATO-s mblidhen sot dhe nesër në Vilnius të Lituanisë.

Samiti zhvillohet në një kohë kritike për sigurinë në Evropë, pasi lufta në Ukrainë është në mesin e një kundërofensive të Kievit.
Samiti vjen, gjithashtu, një vit pas takimit të Madridit, ku aleatët e NATO-s kanë rënë dakord për një koncept të ri strategjik, i cili e ka veçuar Rusinë si kërcënim të drejtpërdrejtë për sigurinë.

Udhëheqësit e vendeve anëtare të organizatës më të madhe ushtarake në botë pritet të diskutojnë për një gamë të gjerë temash, në mesin e të cilave do të dominojnë përpjekjet e Ukrainës për t’u anëtarësuar në NATO, si dhe pranimi i Suedisë në aleancë.

/tv21.tv