Ahmeti: Merko duhet të hetohet..! (VIDEO)

Kryetari i BDI-së, Ali Ahmeti, për herë të parë foli për Ramiz Merkon, i cili javën e kaluar u përfshi në listën e zezë amerikane për dyshimet e tij në korrupsion. Ahmeti nuk përmendi largimin Merkos nga partia dhe as nga funksioni i kryetarit të komunës, por është i mendimit se Merko duhet të hetohet.

“Zoti Merko duhet të hetohet dhe absolutisht zoti Merko nuk e kundërshton një veprim të tillë, sepse vetë ai është votuar në Këshillin e Përgjithshëm dhe në Kryesin e BDI-së, që të hapet hetim, për tërë veprimtarinë e Bashkimit Demokratik për Integrim, që nga viti 2002 deri tani në momentin që po flasim.

Një gjë të tillë e kam kërkuar që të dakordohen të gjithë partitë politike në vend sepse ne nuk mund të bëhemi edhe parti, edhe prokurorë, edhe hetues dhe t’i japim përgjigje çdo shpifje, apo të punojmë në drejtim të zbulimit të vërtetës, kjo i takon organeve kompetente “- deklaroi Ali Ahmeti-kryetar i BDI-së.
Ahmeti bëri apel që të hapet hetim për të gjithë veprimtarinë e BDI-së, për të gjithë funksionarët, duke filluar nga ai.
“I qëndrojmë fortë këtij qëndrimi që të hapet hetim për të gjithë veprimtarinë e BDI-së, për të gjithë funksionarët, duke filluar nga unë deri tek funksionarët tjerë .

Zoti Merko absolutisht nuk i shmanget përballjes me hetimin dhe ne kërkojmë që sa më parë të zbardhet e tërë e vërteta.”- tha Ali Ahmeti-kryetar i BDI-së.
Ahmeti këto komente i bëri pasi dha votën e tij për votimet brenda partiake të cilat mbahen në këshillat vendor.

VIDEO:

/tv21