Prof.Dr Afrim Shabani: Lajm i mirë, Shoqata “Uskana” Sh.B.A.

Lajm i mirë, Shoqata “Uskana” Sh.B.A. ka bërë të ditur se Vëllezërit Dervishi do të marrin pjesë në “Mbrëmja Kërçovare” e radhës.

Vepra muzikore e vëllezërve Dervishi ka në themel artin e mirëfilltë, ka pastërtinë e këngës popullore. Dhe kjo është ajo që i bën kaq të veçantë folkloristët muzikorë, Vëllezërit Dervishi.

Për katër dekada e më shumë ata shquhen për një varg albumesh të realizuara, me qindra këngë, në veçanti të karakterit Kërçovar, po dhe të tjera që hyjnë në kulturën gjithkombëtare. Me fjalë të tjera, Vëllezërit Dervishi janë përfaqësuesit më të denjë të trashëgimisë së folklorit Kërçovar.

Janë po kaq meritor, sepse karakteristikën e të kënduarit të lirikave tona e bënë të njohur kudo në truallsinë shqiptare. Paskëtej studiues të shumtë të folklorit dhe etnokulturës zbarkuan në oazën shumë specifike të fushëgropës së Kërçovës. Dhe sërisht meritorë për këtë, prapë janë Vëllezërit Dervishi.

Isha një muzikant i njomë që sapo kishte zënë fillet e këtij arti, por e kam të freskët kujtimin kur isha përkrah Vëllezërve Dervishi në festivalin e parë popullor “Këngë Jeho” (v.1991) në Strugë.

Që atëhere influenca e tyre tek unë, më jepte një shtytje të arrij gjer këtu ku jam sot. Për këtë, u shpreh një falenderim të veçantë!
Vëllezërve Dervishi ju uroj një mirëseardhje të madhe në Çikago!

Suksese!
Shkruan Prof.Dr Afrim Shabani

/ms