Amerika mund të mbetet pa para pas një muaji..!
Sekretarja amerikane e Thesarit, Janet Yellen, paralajmëroi se SHBA-ja mund të mbetet pa para deri më 1 qershor, nëse Kongresi nuk arrin ta rrisë tavanin e borxhit. Rritja e tavanit të borxhit do të thotë se Qeveria nuk mund të marrë më shumë para hua. Në një letër drejtuar udhëheqësve të Dhomës së Përfaqësuesve dhe Senatit, Sekretarja Yellen i kërkoi Kongresit të mbrojë besimin e plotë dhe kredinë e Shteteve të Bashkuara, duke vepruar sa më shpejt që të jetë e mundur për të rritur tavanin e borxhit prej 31.4 trilionë dollarësh.
JANET YELLEN SEKRETARJA E THESARIT
“Ne kemi mësuar nga ngërçet e kaluara të tavanit të borxhit se pritja deri në minutën e fundit për të rritur tavanin e borxhit mund të shkaktojë dëm serioz në besimin e biznesit dhe konsumatorit, mund të rrisë kostot afatshkurtra të huamarrjes për taksapaguesit dhe mund të ndikojë negativisht në vlerësimin e kreditit të Shteteve të Bashkuara”
Presidenti Joe Biden thirri për një takim të udhëheqësve të Kongresit për këtë çështje, i cili do të mbahet më 9 maj.
Në këtë rast, republikanët e Dhomës së Përfaqësuesve kanë kërkuar shkurtime drastike të shpenzimeve dhe ndryshimin e disa aspekteve të agjendës së Bidenit, duke përfshirë programin e tij të faljes së huave studentore dhe kreditë e taksave të energjisë së gjelbër, në këmbim të votave për të rritur tavanin e borxhit. Kjo ka nxitur kundërshtimin e demokratëve në Senat dhe të vetë Bidenit, i cili ka thënë javën e kaluar, se çështja “nuk është e negociueshme”.
Presidenti, megjithatë, është nën presionin në rritje nga grupet e biznesit, për t’i diskutuar propozimet e republikanëve.
Falimentimi, i cili do të ishte i pari në historinë e SHBA-së, do të mund t’i përmbyste tregjet financiare globale dhe ta shkatërronte besimin te Amerika, si një partnere globale biznesi. Ekspertët kanë paralajmëruar po ashtu, se falimentimi mund ta çojë SHBA-në në recesion dhe të shkaktojë rritje të papunësisë. Tavani i borxhit është rritur, zgjatur ose rishikuar 78 herë në SHBA, që nga viti 1960.
/ms
