Të rinjtë në politikë, vetëm ushtarë fushatash apo zë që dëgjohet..? (VIDEO)

Çdo parti në mesin e organeve të veta ka edhe forumet rinore, ku përgatiten gjeneratat e ardhshme të politikës dhe me shumë gjasa trashëguesit e partisë. Por sa u japin hapësirë këta të rinj e të reja të marrin përgjegjësi për të drejtuar institucione publike apo i ruajnë vetëm si makineri që ndihmon në fushata zgjedhore?

Kryetari i forumit rinor të LSDM-së, Marko Mihailoski, pohon se 1/3 e kandidatëve për deputetë në partinë e tyre përbëhet nga të rinjtë, por shpreson që kjo të bëhet obligative me ndryshimet e reja të kodit zgjedhor, që edhe me ligj të rinjve t’u garantohet më shumë hapësirë.

“Tani e dimë që Ministria e Drejtësisë filloi me ndryshimet e kodit zgjedhor. Këtu shtrohet pyetja nëse edhe ne si politikanë të rinj duhet të kërkojmë të përfshihemi në atë kod zgjedhor ku partitë politike do t’i obligojmë që të rinjtë të kenë vendin e tyre por në vendet fituese. Sepse sipas ligjit duhet të kemi në lista dhe ne si parti politike do të kemi 1/3 të rinj por lufta është që të gjitha forumet rinore të partive të luftojmë ato vende të jenë në eshalonët e para dhe jo vetëm ti mbushim listat nga vendi i fundit e më lartë”, tha Marko Mihailoski, kryetar F.R. LSDM.

Se forumet rinore reflektojnë atë që ndodh në bazën e partisë e kanë dëshmuar së fundmi zhvillimet në BDI. Një pjesë e të rinjve, përfshirë nënkryetarin e forumit, i dolën në mbështetje të ashtuquajturit “grupi i zjarrit” që u formua si fraksion brenda integristëve për shkak të pakënaqësive me punën e ministrave të kësaj partie në Qeveri. Tani edhe brenda forumit rinor të BDI-së është formuar një fraksion, e të cilët flasin për pakënaqësitë për përfaqësimin dhe trajtimin e të rinjve nga partia.

“Unë pajtohem plotësisht dhe ide e kamotshme e rinisë është që kjo të realizohet nuk është se nuk e kemi propozuar, kemi pasur në njësinë numër 6 mos gaboj i cili ka qenë i gjashti në listë. Mirëpo ne kemi dashur që në secilën njësi të jetë ajo. Na thanë që ta dëshmojmë veten që të lobojmë të na fusin në lista në numra fitues mirëpo nuk është realizuar kjo, nuk jemi përfillur në këtë rast”, tha Jetmir Asani, nënkryetar F.R. BDI.

Rast mospajtimesh ka pasur edhe më herët te partitë shqiptare. Lëvizja Besa për momentin është pa kryetar forumi rinor për shkak se dy vite më parë Liridon Useini dha dorëheqje, ndërsa shkruante se “Besa” është shndërruar në strukturë që funksionon mbi baza familjare, klanore dhe rajonale, ku nuk respektohet asnjë organ partiak dhe veçmas duke parë që drejtuesit e Lëvizjes Besa nuk duan ta dëgjojnë rininë dhe Forumin Rinor të partisë.

“…meqë kryetari i Lëvizjes Besa nuk ka dashur t’i dëgjojë vërejtjet e të rinjve të artikuluara përmes meje dhe, madje, as që ka pranuar të takohet, ndërsa unë nuk mund t’i mashtroj anëtarët e Forumit Rinor të Lëvizjes Besa kur ata e shohin edhe vetë se, përveç rrethit të tyre të ngushtë, asnjë i ri nuk është respektuar për asnjë meritë, këtu ka përfunduar marrëdhënia ime me Lëvizjen Besa”, tha Liridon Useini (05.05.2021).

Ndarja e Lëvizjes Besa vite më parë solli edhe ndarjen e forumit të saj rinor, andaj një pjesë e të rinjve mbështetën fraksionin e ri që më pas mori emrin Alternativa dhe doli si parti më vete. Sot edhe Alternativa ka forumin e saj rinor, tek e cila bën pjesë edhe Adem Jashari, i cili shprehet i kënaqur me hapësirën që u jepet të rinjve.

“Në zgjedhjet e kaluara të vitit 2020, kryetari i forumit rinor të Alternativës ishte kandidat për deputet, për një grusht votash nuk arriti të bëhet deputet. Më duhet të theksoj se atë kohë ne ishim në koalicion. Realisht kryetari i forumit të rinisë ishte i dyti për nga radhët e Alternativës. Alternativa mund të mburret se është parti e rinisë. Mendoj që ne si të rinj gjithmonë kemi qenë të përfaqësuar brenda subjektit tonë por edhe në të ardhmen do të vazhdojmë të jemi të përfaqësuar”, pohoi Adem Jashari, F.R. Alternativa.

Aleanca për Shqiptarët po ashtu për momentin është pa kryetar të forumit rinor. Omer Ajdini që nga dhjetori i vitit 2021 ai nuk është më në krye të FRASH-it, pasi ka dhënë dorëheqje. Arsyeja, siç thotë, është rezultati i dobët nga zgjedhjet lokale por edhe se ka pasur bindjen që mandati i kryetarit të Forumit Rinor duhet të jetë 2 vite.

“Forumi Rinor mbetet një platformë e mirë që të rinjtë të kenë mundësinë e ekspozimit dhe mësimit gjatë angazhimit të tyre në parti politike. Në anën tjetër mbetem i pasigurtë për efektivitetin e forumeve rinore për të avancuar përfaqësimin rinor nëpër parti dhe në qeverisje, dhe prandaj mendoj që forma e organizimit të të rinjve duhet të mendohet edhe më mirë”, tha Omer Ajdini, ish-kryetar i FRASH.

Një e dhënë shqetësuese për vendin është se të rinjtë gjithnjë e më tepër ikin drejt perëndimit për punë dhe jetë më të mirë, ndërsa shpesh politika kritikohet se shpesh punësimet e të rinjve bëhen vetëm nëse ata kanë në xhep librezë partiake.

VIDEO:

/tv21