Takim liderësh te Pendarovski, pritet anulimi i zgjedhjeve për shkak virusit korona

Sot do të mbahet takim liderësh në vilën presidenciale në Vodno, ku presidenti Stevo Pendarovski, do t’i mbledhë liderët e partive politike në vend për të diskutuar rreth anulimit të zgjedhjeve të parakohshme parlamentare të 12 prillit për shkak të situatës në vend me virusin korona, njofton Portalb.mk. Sipas qëndrimeve të partive, pritet të anulohen zgjedhjet.

Liderët e LSDM-së dhe VMRO-DPMNE-së, Zoran Zaev dhe Hristijan Mickoski kërkuan që të anulohen zgjedhjet.

“Shëndeti dhe siguria e qytetarëve nuk kanë çmim. Tani gjithçka duhet që të jetë në mbrojtje të qytetarëve. Unë në emër të LSDM-së do të kërkojnë organizim të takimit të liderëve me kryetarët e partive politike në të cilën do të diskutohet për anulimin e zgjedhjeve. Tani nuk është për kundërshtarë politik deh është më e rëndësishme që përqindja e të sëmurëve të jetë sa më i vogël dhe të njëjtët të shëndoshen tërësisht. Është koha që qytetarët të jenë të bashkuar”, tha Zaev.

Edhe Mickoski nëpërmjet një statusi në profilin e tij të Fejsbukut, kërkoi që sot të mbahet takim i liderëve me partitë te presidenti Pendarovski, që të merren vesh për anulimin e zgjedhjeve.

“Të gjitha rekomandimet e organizatave të brendshme dhe botërore janë se përgjigja më e mirë për përballje me virusin korona është shmangia e aktiviteteve. Me kësi analiza, parashikohet që zgjedhjet mund të hapin vatra zjarri të virusit korona. Paramendojeni ditën e zgjedhjeve kur në një hapësirë do të jenë anëtarët e bordit zgjedhor. Nuk ka asnjë arsye të shëndoshë, njerëzore, racionale apo pragmatike që të mos anulohen, pasi që për mua, por besoj edhe për të tjerët, lufta për pushtet me çmim të jetëve të qytetarëve është e papranueshme”, shkruajti Mickoski.

Edhe kryetari i BDI-së, Ali Ahmeti, ka dhënë pëlqimin për anulimin e zgjedhjeve.

“Prioritet absolut i gjithësecilt prej nesh, ne veçanti neve që jemi në shërbim publik, është qytetari dhe shëndeti publik. Zgjedhjet dhe fushata janë çështja e fundit në rradhën dhe agjendën e prioriteteve tona, për arsye se të gjitha kapacitetet tona njerëzore, intelektuale, institucionale i kemi vënë në shërbim të ngadhnjimit në betejën e përbashkët kundër virusit. Tash, neve na duhet fitore ndaj virusit e jo fitore në zgjedhje. Me zgjedhjet dhe fushatën do të mirremi pasi ta mposhtim këtë kërcënim ndaj të gjithë neve dhe bashkë ju siguroj se do ta mposhtim.Ne jemi tërësisht të përkushtuar në adresimin e gjendjes me CoVid-19 dhe t’ju dalim në ndihmë qytetarëve, mjekëve dhe ekonomisë.” shprehet Ahmeti.

Bilall Kasami nga Lëvizja BESA, gjithashtu është për shtyrje.

“Shëndeti i qytetarëve është më i rëndësishëm se çdo kalkulim politik, prandaj në emër të Lëvizjes BESA i bashkangjitemi thirrjes për anulim të zgjedhjeve parlamentare për një datë më të përshtatshme dhe periudhë, ku rreziku nga virusi COVID-19 do jetë i eleminuar plotësisht. Fitorja më e madhe e jona është mbrojtja e shëndetit të qytetarëve. U bëj apel gjithë qytetarëve që të respektojnë rekomandimet e institucioneve shëndetësore dhe bashkarisht të ndihmojmë në izolimin dhe eliminimin e plotë të kësaj pandemie.” tha Kasami.

Edhe partia Alternativa kërkon shtyrje.

“Në kohën kur krejt bota po merr masa për parandalimin e infektimit të njerëzve nga virusi COVID -19, edhe Alternativa – si parti politike në vend e cila para çdo interesi tjetër e ka interesin e qytetarëve – gjykon se zgjedhjet e paracaktuara për 12 prill 2020 duhet të shtyhen për një datë tjetër, e cila do të jetë e dakorduar nga të gjithë partitë politike në vend dhe në kushte kur nuk do të kemi presionin e pandemisë që e ka kapluar botën.Sot, kur të gjithë jemi të brengosur për jetët e qytetarëve tanë, nuk ka asnjë kuptim që të mbahen fushatë zgjedhore, aq më shumë që këto janë ditë kur neve, më shumë se kurdoherë, na duhet më shumë solidarizim dhe kohezion.Nisur nga kjo, AlternAtiva edhe në takimin e liderëve do të mbajë qëndrimin që zgjedhjet të shtyhen dhe ato të mbahen në kushte normale. Për ne, shëndeti i qytetarëve është më i rëndësishëm së zgjedhjet!” u shprehën nga Alternativa.

/portalb