Kërçovari Hamit Limani aktivisti që inicoi paralelen e gjuhës shqipe për fëmijët e mërgimtarëve..
Konsullata kosovare e Iowas që nga data 1 prill, mundëson ndjekjen e kurseve të gjuhës shqipe për fëmijët e mërgimtarëve tanë që jetojnë dhe veprojnë atje.
Ky projekt i një rëndësie të veçantë, vjen si rezultat i bashkëpunimit të autoriteteve vendore të shtetit Iowa me konsullatën e Kosovës dhe komunitetin shqiptar të Amerikës.
Lajmin e ka bërë të ditur konsullata e Kosovës në Des Moines, përmes një shkrimi zyrtar që e ka transmetuar edhe Klan Kosova. “Abetarja unike i bashkoj shumë fëmijë dhe familje shqiptare në Des Moines.
Urojmë që ky model i bashkëpunimit me komunitetin të jetë udhërrëfyes i fuqizimit të diasporës shqiptare gjithandej SHBA-ve. Ruajtja e gjuhës, traditave dhe vlerave kombëtare është misioni ynë kryesor”, thuhet në komunikatën zyrtare, me të cilën ju shprehet mirënjohje të gjithë atyre që kontribuan për realizimin e këtij projekti madhor me karakter kombëtar.
“Falënderojmë të gjithë ata që besuan në këtë nismë. Falënderojmë Albanian American Alliance me udhëheqës Hamit Mike Limani për mbështetjen në realizimin e kësaj iniciative”.
Në fakt ky është kërçovari nga Zajazi i Kërçovës Hamit Limani, aktivisti që inicoi dhe realizoi këtë projekt kombëtar të gjuhës shqipe në Amerikën e largët, respektivisht në Des Moines të shtetit Iowa, ku ai prej kohësh ushtron veprimtarinë e tij të biznesit dhe është kryetar i shoqatës Albanian American Alliance.
Pa dyshim ky është një aksion fisnik me bazë identitare për fëmijët e vendlindjes së tij dhe gjithë shqiptarisë, të cilëve ju jepet hapësira për mësimin e gjuhës së shenjtë shqipe, gjuhën e gjyshërve dhe stërgjyshërve tanë, që sipas studimeve shkencore, vlersohet si më e vjetra, jo vetëm në ballkan, por edhe në Evropë.
Duke u nisur nga kjo frymë atdhetare që bazohet në përkushtimin për gjuhën si element kryesor identitar, “Xixa Press”, ju prezenton një informacion më të detajuar që shpalos detajet e kësaj iniciative që u bë realitet përmes Albanian American Alliance dhe mërgimtarit nga Zajazi i Kërçovës, Hamit Limani.
Pikënisja e kësaj iniciative, thotë ai, është unifikimi i Abetares shqipe dhe mbështetja e konsullatës kosovare me seli në Des Moines, që mundësoi ndjekjen e kurseve të gjuhës shqipe për fëmijët tanë në shtetin e Iowa të Amerikës.
Në pyetjen tonë, se si u konkretizua ky projekt me taban kombëtar, ai përgjigjet:
Përkujdesja ndaj fëmijëve tanë të diasporës, është një borxh ndaj atdheut dhe vendlindjes, ndërsa mbjellja e gjuhës shqipe tek gjenerata më e re është një hap i rëndësishëm për njohjen e origjinës kombëtare dhe vlerave etnokulturore shqiptare.
“Gjatë takimeve që kemi pasur me përfaqsues të Konsullatës së Kosovës në Des Moines, kemi biseduar për iniciativat që i bashkojnë shqiptarët. Fillimisht organizuam manifestimin kushtuar Flamurit tonë Kombëtar, dhe pas këtij organizimi të suksesshëm, lindi ideja e hapjes së paraleles për mësimin e gjuhës
shqipe.
Konsullata kosovare, këtë ide të mbështetur edhe nga mërgimtarët tanë, ia prezentoi MPJ dhe Qeverisë së Kosovës, e cila e pranoi dhe e mbështeti pa asnjë hezitim.
Ky projekt u bë realitet më datë 1 prill, me një ceremoni solemne që shënon fillimin e punës për mbajtjen e orëve mësimore për fëmijët tanë”, shprehet kryetari i organizatës joqeveritare Albanian American Alliance, Hamit Mike Limani, i cili shton se organizata që ai udhëheq ka marrë përsipër edhe kompenzimin financiar për arsimtaren që do të mbajë orët mësimore me fëmijët si dhe harxhimet e nevojshme për funksionimin e kësaj shkolle.
Mësojtorja i plotëson të gjitha kushtet për organizimin e orëve mësimore dhe është e gatshme që të pranojë të gjithë fëmijët për ndjekjen e orëve mësimore në gjuhën shqipe, prandaj kryetari shoqatës Hamit Mike Limani u bën thirrje të gjithë familjeve shqiptare që ti dërgojnë fëmijët e tyre në shkollën shqipe, ku i pret një mësim cilësor intenziv i shkronjave shqipe dhe vlerave etnokulturore të origjinës shqiptare.
Shkruan Shaban Dalipi
/XixaPress
