Shqiptari arrestohet me çaj mali pasi u dyshua se ishte drogë..!

Piktori dhe dekoratori shqiptar Agim Agaj është arrestuar për 15 orë nga policia britanike për shkak të çajit të malit që mbante në furgonin me të cilin udhëtonte. Efektivat kanë dyshuar se bima ishte lëndë narkotike, por brenda pak orësh ekspertiza provoi të kundërtën. 53-vjeçari i tha medias se policët i kontrolluan edhe banesën atij dhe një miku.

Një 53 vjeçar shqiptar u arrestua nga policia britanike për më shumë se 15 orë, pasi efektivat dyshuan se çaji që ai kishte në automjet ishte bimë e paligjshme narkotike.

Piktori dhe dekoratori Agim Agaj, sipas “The Sun”, u kontrollua dhe u mbajt në qeli të shtunën pasi policët gjetën gjethet e bimës në furgonin me të cilin ai po udhëtonte.

Megjithatë, mediat britanike thonë se pas ndalimit të 53-vjeçarit, u deshën disa orë derisa të sqarohej se personi i ndaluar ishte shumë larg të qënit një bos droge dhe se kontejneri i madh plastik midis sediljeve përmbante vetëm çaj mali.

Policia e ka argumentuar ndalimin e përkohshëm të 53-vjeçarit me dyshimet e oficerëve të cilët gjatë kontrollit menduan se bimët në automjetin e shqiptarit ishin marihuana.

Me këtë dyshim ata e prangosën dhe e hodhën në qeli Agajn në mënyrë të përkohshme. Pas sqarimit të ngjarjes, 53-vjeçari foli për median dhe tha se u ndalua nga dy efektiva policie.

“Një hapi derën e furgonit dhe pa se kisha një enë të madhe plastike. Nuk kishte erë si barërat e këqija. Edhe një fëmijë mund të shohë se çfarë është çaji dhe çfarë është kanabisi”, tha ai për “The Sun”.

Megjithatë Agimi u mbajt në një qeli të shtunën mbrëma në Weymouth, Dorset, dhe u intervistua të nesërmen para se të lirohej pa asnjë akuzë sepse ndaj tij nuk u gjetën prova.

Ai pretendoi se oficerët shkuan për të kontrolluar shtëpinë e tij të vjetër dhe shtëpinë e një shoku.
Agimi i tha medias se e pi çdo ditë çajin tradicional shqiptar. Ai shtoi se nuk e dinte arësyen pse policët e ndaluan dhe shtoi se nuk kishte pasur kurrë punë me policinë.

/oranews