Kush ishte veterani i arsimit Rahman Fejza..?

RAHMAN FEJZA është i lindur në vitin 1926 në Garanë të Kërçovës. Rafman Fejza është djali i dytë i Refat Hoxhës nga fshati Garanë, mëhalla e Losheve.

Shkollën fillore të ulët – katërvjeçare e ka kryer në gjuhën serbe dhe pastaj ka vazhduar mësimin në gjuhën shqipe te mësues Pertef Therepeli. Për herë të parë fillon të punojë në Lerë dhe Ramnë e Zlakuqan të Shkupit.

Në Kishavë të Manastirit takohet me mësuesen Samije, më pastaj të dy kalojnë në Ostrec dhe pastaj vazhdojnë me punë si arsimtarë në fshatin Dragomisht të Madh dhe më vonë në qytet të Kërçovës, ku vazhdon të punojë në Kliment Ohridski (Sande Shterioski) në Kërçovë deri ka vitet e 70. Mësues Rahmani pastaj vazhdon të punojë në komunën e Kërçovës deri në pension në vitin 1987. Në vitin 1991 ndërron jetë.

Ka pasur vëlla të madh Bajramin i cili ka punuar në Gjermani dhe është I vdekur dhe Islamin (Lomin e hoxhës) më i ri se ai, i cili ka vazhduar të jetojë në SHBA të Amerikës, poashtu edhe ai ka ndërruar jetë dhe është varrosur në varrezat e fshatit në Garanë.

Ishte i martuar me Samije Fejzën poashtu mësuese nga Manastiri me të cilën pati nji djalë (që ndërroi jetë në moshë të re dhe një vajzë). Edhe Samija ka punuar në arsim dhe ka qenë njëra ndër mësueset e para shqiptare.

Rahmani vazhdon të punojë në tetvjeqaren e Kërçovës, në atë kohë në shkollën tetvjeçare të qytetit mësohej vetëm maqedonisht dhe mësues Rahmani është ai i cili për herë të parë hapë paralelet në shkollën fillore të qytetit të Kërçovës në gjuhën shqipe.

Rahman Fejza kontriboi edhe në hapjen e parë të paraleleve shqipe në gjimnazin e Kërçovës, në vitin shkollor 1967-68. Kjo ishte gjenerata e parë të cilës Rahmani kishte qenë kujdestarë klase në tetvjeqare dhe ata të njejtit vazhdojnë në gjimnaz.

Në atë kohë një numër i fëmijëve shqiptarë kanë qenë të regjistruar në shkollë (gjimnaz) por kanë mësuar në gjuhën maqedonase dhe të tjerët kanë vazhduar në Gostivar, Shkup e më larg.

Rahman Fejza ka qenë mësimdhënës për lëndën e Matematikës dhe Fizikës në tetëvjeçare dhe ka dhënë kontribut të madh duke mbështetur kërkesat e prindërve të asaj kohe që fëmijët e tyre të mësojnë në gjuhën shqipe, kërkesë të cilën e ka kundërshtuar komiteti komunal i asaj kohe dhe konkretisht drejtori i gjimnazit të Kërçovës, Vecko Avramoski.

Mësues Rahman Fejza kujtohen nga nxënësit e tij, si personalitet shumë i saktë, i dashur dhe principiel në punën e tij.

Shkruar nga
Dr.Kujtim Kasami

/ms