Intervistë me poetin Kërçovar Vahit Nasufi

Marrë nga intervista e realizuar në “TV FESTINA”
Kërçova është një qytet i bukur dhe i rrafshët, me plot histori.

Përveç tjerash, ajo që të le përshtypje për të mos e harruar kurrë, është mikpritja shqiptare tipike kërçovare.

Këtu në Uskanën e lashtë, çdo shtëpi është e gatshme të hapi dyert për të pritur mysafirët e saj. Them kështu, pasi në Kërçovë dhe rrethinë, si këngëtar kam qënë i ftuar në shumë dasma familjare.

Gjithëashtu kam qënë edhe me “TV FESTINA” nga Ferizaji, duke realizuar emisionit tim, “VLERAT E FOLKLORIT”, ku kemi kaluar jashtëzakonisht mirë.

Kjo trevë, përveç trimërisë, mikpritjes, bujarisë, patriotizmit, sportit artit, kulturës, arsimit etj, më së miri identifikohet me këngën e saj polifonike vendase shumë të vjetër.

Por, ajo që neve na shtyri të vijmë këtu në Kërçovë, është vepra letrare e poetit kërçovar Vahit Nasufi, për të zhvilluar një intervistë rreth veprës së tij, dhe jetës si qytetar, i cili në shtëpinë e tij na priti me një mikpritje të ngrohtë shumë bujare.

XHEMAJL BERISHA: Z. Nasufi, faleminderit shumë që pranuat ftesën që të bëjmë këtë bashkëbisedim, pas disa përpjekjesh më në fund ia dolëm, kërkojmë ndjesë për shqetsimin.

VAHIT NASUFI: Faleminderit nga zemra edhe juve, sëbashku me ekipin realiues, që keni ndarë një pjesë të kohës suaj dhe që keni marrë një rrugë bukur të gjatë, për të ardhë nga Kosova, këtu në Kërçovë. Sa i përket shqetësimit, ua them sinqerisht se jam i privilegjuar të intervistohem nga TV Festina, nuk jam fare i shqetësuar, andaj mos u ngushtoni aspak.

XHB: Për fillim, në pika të shkurtëra, a do t`na thoni kush është Vahit Nasufi?
VN: Unë jam i lindur më 09 dhjetor 1956, në fshatin Shitovë, të Kërçovës, por, në vitin 1990, krejt familja u shpërngulëm në qytet!.Ciklin e parë të shkollës fillore, e kreva në fshatin e lindjes, kurse ciklin e dytë, në shkollën qëndrore në fshatin Garanë, me sukses të shkëlqyeshëm. Pasi e kreva shkollën fillore, vazhdova mësimet në gjimnazin “MIRKO MILESKI”, të Kërçvës. Jam babai i dy fëmijëve i të dy gjinive. Vala kurbetçare e vitit 1980, si shumë shokë të tjerë, më rrëmbeu edhe mua! Që atëherë me familjen jetoj në qytetin turistik në Shafhauzen të Zvicrës.

XHB: Edhe pse kanë kaluar ca vjet, por, juve sigurisht u kujtohet fëmijëria juaj, si do ta përshkruani me pak fjalë?
VN: Lirisht mund të them se fëmijërinë unë e kam kalur në lumturi, nga e cila ruaj shumë kujtime të bukura. Jam rritur me prindër dhe me dy vëllezër, unë jam më i vogli. Me që babai im ka qenë kurbetçar dhe nëna amvise, ne kishim një jetë, të rëndomtë dhe, shumë të lumtur.

XHB: Z. Nasufi, si e zbuluat talentin apo prirjen, për të shkruar poezi, që Ju njiheni për përputhjen e rimave?
VN: (Qesh), Faleminderit shumë për komplimentin. Që nga këlasa e shtatë dhe e tetë, të shkollës fillore, arsimtari i gjuhës shqipe, na thoshte që të gjithë nxënsit të shkruajmë nga një poezi, dhe tri më të mirat do të botoheshin te gazeta e atëhershme e përditshme, “FLAKA E VËLLAZËRIMIT” e cila botohej në Shkup. Të dyja herët, poezitë e mia u E zgjodhën ndër tri më të mirat dhe u botuan, dhe më nuk shkrujata asnjë poezi tjetër, deri kur shkova në kurbet. Atje fillova të shkruaj për vuajtjet e kurbetçarit, për mallin ndaj familjes, mallin për vendlindjen, kështu që si thotë populli, Gur – gur u bë një mur!

XHB: Që donë të thotë, se shkruajtët aq poezi të cilat i botuat në një libër. Për ata që më pak u njohin, sa libra keni botuar deri tash?
VN: Deri tash kam botuar pesë libra. Besoj se vlen të ceket, se të gjitha librat që i kam botuar deri tash i kam dhuruar, edhe pse disa lexues kanë tentuar që t`i paguajnë librat, por, jo, pasi unë krijoj për lexuesit dhe jo për përfitime materiale! Në kopertinën kurrizore të librave, shkruan se libri nuk shitet, por, dhurohet!

XHB: Ju, shkruani vetëm poezi apo edhe prozë?
VN: Unë kryesisht shkruaj poezi, më shumë janë përkushtuese, që ua dedikoj figurave të njohura kombëtare, heronjëve të kombit, artistëve, respektivisht këngëtarëve të mirënjohur, sportistëve, poezi kurbeti, dashurie, satirike, etj. Këtu dua të sqaroj se poezitë apo poemat e mia janë prej 14 – 40 strofë! Ndoshta tituj duken pak, por, strofë prej katër vargjesh, janë mbi 1300! Kam shkruar shumë edhe prozë, jam munduar që ngjarjet më interesante, t`i shëndrroj në vepra arti.

XHB: Ju lumtë, z.Nasufi. Na thuaj ku i botoni librat tuaja, në cilën shtypshkronjë, këtu në Kërçovë apo në Zvicër?
VN: Të pesë librat i kam botuar te shtëpia botuse “FENIKS”, këtu në Kërçovë, një shtëpi botuese me shumë eksperiencë dhe jam shumë i kënaqur me punën e tyre kualitative, dhe shërbimin superior, nuk dua t`i bëj reklamë shtypshkronjës, por, kjo që them, është më se e vërtetë!

XHB: Na trego pak rreth vështirësive, që hasni në thurjen e vargjeve poetike, se të përputhish rimat nuk është fare e lehtë?
VN: Sigurisht se nuk është aspak e lehtë. Të thurish një poezi përkushtuese, është si një labirint që të ndodh gjatë rrugëtimit jetësorë. Të shkruash një poezi dashurie është fare e lehtë, por, nëse dikujt i kushton një poezi, është pak më ndryshe, pasi ka shumë fjalë që është vështirë për t`ua përputhur rimën! Unë deri tash nuk kam as një strofë pa përputhjen e rimave, vargu i parë me të dytin dhe i tretë me të kartin.

XHB: Kur shkruani, jeni vetvetja apo mundoheni të shkruani në stilin e dikujt, mos themi se a kopjoni dikë?
VN: Jo, jo, kurrë, as që kam menduar të bëj diçka të tillë, të kopjosh dikë të mos e them se është plagjiate, por, e ngjajshme me te, që unë nuk e preferoj fare, përkundrazi. Unë kam stilin tim të krijimtarisë dhe aty do të qëndroj deri në fund, në qoftë se është diçka e mirë dua që merita të jetë e imja, ose e kundërta.

XHB: Sigurisht se lexuesit janë kurioz ta dinë, çfar presim nga Ju në të ardhmen, z. Nasufi?
VN: Aktualisht jam në përfundim të librit të gjashtë, i cili nga shtypi duhet të dalë në korrikun e ardhshëm, dhe nëse punët shkojnë sipas planit, do të bëhet edhe promovimi i tij, por, se çfar do të ketë brënda tij, më mirë ta lëmë si surprizë për lexuesit!

XHB: Z: Nasufi, sa tekste të poezive tuaja janë shëndrruar në këngë? Pasi para ca muajsh, kemi dëgjuar një këngë shumë të bukur, me një tekst madhështor, për këngëtarët që nuk jetojnë më fizikisht, që autor i tekstit jeni Ju!
VN: Po, janë disa tekste që janë kënduar në zhanrin folklorik, nga rapsodët e mirënjohur, Mehmet Iseni – Petrovci dhe Isuf Rashiti. Sa i përket tekstit të këngëtarëve të pa vdekshëm, edhe pse janë të ndjerë, aty përfshihen mbi 50 këngëtarë dhe këngëtare, që kanë lënë pas shumë vepra me vlerë artistike, nga i gjithë trungu shqiptar. Sigurisht se ka nga ata ose ato, që e meritojnë të jenë aty, dhe nuk janë, por, është e pamundur të përfshihen krejt me një këngë, kërkoj ndjesë prej të gjithëve që nuk ua kam përmendur emrat.

XHB: JU keni shkruar një thesar veprash madhështore, lind pyetja se a i ka vlerësuar ndonjë institucion apo shoqëri, duke u shpërblyer juve me ndonjë çmim apo mirënjohje?
VN: Ky mund si duket nuk më ka shkuar kot. Përveç lexuesëve që nëpërmjet komenteve të shumta, që më kanë dhënë përkrahje të fuqishme, kam marrë edhe disa mirënjohje dhe çmime, por unë do të veçoj vetëm tri nga ato. Në vitin 2019, nga komuna e Kërçovës, në cilsinë e krijuesit, jam shpërblyer me çmimin “KUPA VOTRA”, si personalitet i vitit 2019. Ndër kohë nga “ELITA E POETËVE SHQIPTARË”, me seli në Tiranë, me administrator poetin e madh, Prof. z. Zeqir Hysa, kam marrë çmimin “NDERI I ELITËS”, dhe në vitin që sa po e lam pas, nga EPSH -rë, mora diplomën, “POET I VITIT 2022”. Në vitin 2021, isha i ftuar në Skup, që të marr edhe një, çmim tjetër, por, për shkak të pandemisë, evenimenti që ndante çmimet e parapara u anulua!

XHB: Gjithë këto poezi apo poema, por, jo vetëm, A i keni botuar në portale apo vetëm nëpër libra z. Nasufi?
VN: Që nga viti 2010, e deri sot, unë gati çdo muaj nga një poezi apo ese i kam botuar këtu te shumë e lexueshmja gazeta elektronike ”ZEMRA SHQIPTARE”, të cilës i jam shumë mirënjohës, pasi ajo i ka botuar të gjitha, në kohë reale dhe në mënyrën më të mirë të mundshme. Ndërgjegja nuk më lejon të mos e falenderoj nga zemra drejtorin e saj të përgjithshëm, z. Gëzim Marku nga Shkodra, stafin e realizues si dhe lexuesit e saj.

XHB: Shtëpitë radio – televizive dhe portalet, janë ata që na informojnë më së miri, pytja është; sa kanë qenë të interesuara që juve t`u afrojnë më afër lexuesëve?
VN: Po, më kanë kontaktuar, nuk mund të them se jo, por, me që unë pjesën më të madhe të jetës e kaloj në Zvicër, dhe është pak vështirë për të realizuar intervista të tilla. Unë intervistën e parë televizive, e kam dhënë për “RADIO – TELEVIZIONIN SHQIPTAR”, intervistues ishte artisti i popullit – Llesh Nikolla nga Tirana, kam dhënë intervista edhe për televizionin “GURRA”, këtu në Kërçovë, me insistimin e gazetarit të pa lodhshëm, z. Bekim Adili poashtu nga Kërçova. Njërën prej intervistave e realizuam në natyrë te Kalaja e Kërçovës, e cila e zbukuron qytetin. Vlen ta cek se për krijimtarinë time, një artikull prej dy faqesh ka shkruar edhe gazeta “PERSPEKTIVA”, me autor, z. Bilall Maliqi nga Presheva.

XHB: Jemi të bindur se keni lexuar shumë romane nga poetë të ndryshëm, por, cili roman u ka pëlqyer më shumë?
VN: Është shumë e vërtetë, unë kam lexuar shumë romane, lexoj edhe sot, por, ata që më kan lënë përshtypje më së shumti janë romanet: “SIKUR TË ISHA DJALË”, botuar në vitin 1936, nga Haki Stërmilli, dhe romanin, “GREMINA E DASHURISË”, me autor Mustafa Greblleshin, botuar në vitin 1944, sigurisht se janë edhe ca të tjerë që nuk janë pak.

XHB:Në bazë të asaj që kemi lexuar shihet qartë se jeni dashamirë i muzikës, jemi kurioz të dimë, se çfar muzike dëgjoni?
VN: Për mua muzika është një element që bënë pjesë në jetën e njeriut. Unë dëgjoj shumë muzikë popullore, por, ajo që më fle në shpirt është kënga folklorike burimore. Nuk mund të mos e them se shumë i dua dhe i dëgjoj me ëndje edhe këngët autoktone polifonike kërçovare!

XHB: Secili prej nesh, pa dyshim e ka një këngëtarë të preferuar, na thoni z. Nasufi, cili është këngëtari juaj që Ju e adhuroni më shumë?
VN: Shiqoni, unë më shumë dëgjoj këngë rapsodike, dhe rapsodët që mjerisht shumica prej tyre nuk janë në mesin tonë, por këngëtari im i preferuar ka qenë Demir Krasniqi, tani i ndjerë, ndjesë past, me të cilin kemi qënë edhe shokë shumë të ngushtë, ua them sinqerisht se ikja e tij në botën e amshimit më ka prekur shumë! Gjithashtu e kam adhuruar shumë edhe këngëtarin e madh nga Gostivari, z. Maksut Dehari, të cilit i kam kushtuar edhe një këngë folklorike, pasi në moshën 53 vjeçare, i shkoi zëri i bukur melankolik, Maksut Dehari ka qënë një këngëtar i jashtëzakonshëm dhe i tillë do të mbetet gjithmonë.

XHB: Jeni adhurues i sportit, nëse po, kush është skuadra juaj e preferuar?
VN: Për mua, si muzika ashtu edhe sporti, sidomos ai më i popullarizuari që është fudbolli, janë pjesë e pa ndashme të jetës sime, por, secila ka peshën e vet. Jam adhurues i Bajernit të Mynihut, por, kuptohet i përcjellë rregullisht edhe ndeshjet e ligave më të forta të Europës, kur luajnë klubet me renome kundër njëri – tjetrit, si dhe ligën e kapionëve.

XHB: Dalë nga dalë arritëm deri te pyetja e fundit. Si e kaloni kohën e lirë z. Nasufi?
VN: Sa i takon kohës së lirë, zakonisht me familjen, kur është koha e mirë dal shetis në natyrë, herë vetë, herë me shoqëri, pastaj pak në interrnet, në mbrëmje ndodh shpesh që me shokë të ulemi në ndonjë lokal sa për relaksim dhe bëjmë biseda të ndryshme.

XHB: Z. Nasufi, jemi të vetëdijshëm se ka edhe shumëçka që të flitet, por, ndoshta ndonjë herë tjetër dhe me krijime të reja. Edhe një herë shumë faleminderit për gjithëçka.
VN: Ishte kënaqësi për mua të intervistohem nga TV Festina. Edhe unë jam shumë mirënjohës ndaj jush, për interesin që keni treguar ndaj veprimtarisë sime. Faleminderit shumë nga zemra.

/ms