Në Kinë ndërtohet spital për 48 orë, ndërsa në Kërçovë 30 vjet..? (VIDEO)

Në Kinë është hapur spitali i veçantë për trajtimin e pacientëve me koronavirus, i cili është ndërtuar vetëm për dy ditë, raporton Daily Mail. Siç theksohet në median britanike, stafe punëtorësh nga kompani të ndryshme dhe vullnetarë nga Vuhani, kanë punuar për ndërtimin e këtij spitali, duke e përfunduar brenda 48 orësh. Kinezët e kanë paraparë të ndërtojnë edhe një spital tjetër për një javë.

Por sa zgjat ndërtimi i spitaleve në Maqedoni?

Rekordin e mban spitali në Kërçovë i cili ka filluar të ndërtohet rreth vitit 1989. Edhe pas 30 viteve, ende nuk ka përfunduar.

“Ky objekt është i ndërtuar qysh herët, d.m.th rreth viteve ’85-’89. Fakt që është ndërtuar që njëzet vite dhe nuk është në funksion. Projekti është i ndarë në dy faza. Faza e parë e projektimit dhe e ndërtimit bashkë me rikonstruimin e objektit aktual është dhjetori. Ndërsa, në përgatitje e sipër është duke u bë shpallja për fazën e dytë të tenderimit që duhet ta kompleton spitali për ta vënë në funksion në 2017-tën”, deklaroi Nasuf Nipçja, ish-sekretar shtetëror Ministrinë e Shëndetësisë.

Kur TV21 e pyeti ministrin e tanishëm të Shëndetësisë Venko Filipçe se kur do të mbarojnë punimet e këtij spitali, ai nuk përcaktoi afat.

“Në Kërçovë kam qenë para dy muajve dhe tani e fillojmë procedurën për shpalljen e tenderit për fazën e dytë të spitalit, atje është përfunduar faza karabin. Ishim në vendngjarje bashkë me drejtoreshën e spitalit dhe duket ndërtesë solide e cila tërësisht mund ta marrë kapacitetin nga spitali ekzistues, i cili në të vërtetë është në gjendje të keqe”, theksoi Filipçe.

Në vitin 2013, Projekti për këtë spital u miratua nga Qeveria dhe u ndanë mjete në vlerë prej 3.7 milion euro duke u dhënë si afat i fundit viti 2014 për përfundimin e punimeve. Sot e kësaj dite, qytetarët e Kërçovës, vizitat e tyre mjekësore i kryejnë në objektet e vjetra që janë drejt rrënimit.

Spitalin e premtuar nuk po munden ta shijojnë as banorët e Shtipit.

Projekti i Spitalit të Shtipit është nga viti 2015 dhe kap shumën prej 30 milionë eurosh. Punimet në këtë spital kanë stopuar tashmë 3 muaj.

Një spital është premtuar edhe në Strugë. Filipçe gjatë një vizite në këtë rajon pati njoftuar se në vitin 2020 është planifikuar të fillojë projektimi për spitalin e ri, por nuk përmendet askund fillimi i ndërtimit.

Vitin e kaluar u finalizua edhe projekti për një Qendër të re klinike e cila do të ndërtohet në Gjorçe Petrov. Klinika e re do të kushtojë rreth 500 mijë euro dhe ndërtimi i së njëjtës është paraparë që të zgjasë 7 vjet.

“Faza e parë ka përfunduar. Së shpejti fillojmë me fazën e dytë , ku duhet të fillojmë dialog me operatorët ekonomik që u përzgjodhën në fazën e parë, ajo është kompania franceze Bujk dhe kompania gjermane Vamed”, deklaroi ministri i Shëndetësisë Filipçe më 22 janar të këtij viti.

TV21 ka raportuar për problemet dhe kushtet e këqija edhe nëpër shumë institucione shëndetësore tjera. Së fundmi për kaosin në parkingun në Qendrën Klinike “Nënë Tereza” në Shkup, pastaj për shtëpinë e Shëndetit publik në Gostivar dhe Spitalin e Gostivarit.

Kushtet e këqija janë edhe në klinikën në Gjorçe Petrovit. Në spitalin e Manastirit ka mungesën të hemoterapisë. Probleme të pazgjidhura mbeten ngrohja me mazut në Gjinekologjinë “Nënë Tereza” në Çair, rruga për në spitalin e fëmijëve Kozle e tjerë.

VIDEO:

https://www.youtube.com/watch?v=fgAOPudkhjI

/tv21