Zvicër: Vdesin dy të rinj duke ikur nga policia..

Në mbrëmjen e së martës, në H10 ka ndodhur një aksident me fatalitet pranë pishinës Combes. Dy të rinj janë gjetur të vdekur.

Policia e Neuchâtelit është informuar se ka ndodhur aksidenti rreth orës 1:30 të mëngjesit të së martës, transmeton albinfo.ch.

Pak para këtij raporti nëpërmjet qendrës së thirrjeve të urgjencës në Neuchâtel, kur një patrullë në St-Sulpice po kryente një kontroll trafiku, një automjet ka kaluar me shpejtësi të madhe në Rue de la Place d’Armes në Fleurier në drejtim të Boveresse, njofton Policia e Neuchâtelit.

Një patrullë policore pastaj ka provuar të kontrollonte mjetin në fjalë, por ai i ka humbur nga sytë për shkak të shpejtësisë së madhe në rrethrrotullimin e afërm, shkruan 20minuten.ch. Kërkimi i bërë në zonë dhe deri në fshatin Couvet rezultoi i pasuksesshëm.

Menjëherë pas kësaj, një banor ka njoftuar se ka ndodhur një zjarr nën rrugën kantonale. Në vendndodhjen e zjarrit është konstatuar se një automjet ishte përfshirë nga flakët. Shoferi dhe një pasagjer janë gjetur të vdekur pranë mjetit të aksidentuar. Të dy ishin banorë të rajonit.

Viktimat ishin dy të rinj të moshës 19 dhe 21 vjeçare, transmeton albinfo.ch. Një ekip i madh shpëtimi ka shkuar në vendngjarje. H10 është bllokuar dhe pastaj rihapur, pak para orës katër të mëngjesit.
Prokurori përgjegjës ka nisur hetimet për zbardhjen e shkaqeve dhe rrethanave.

/albinfo