Ukrainës po i harxhohen municionet..

Forcave ukrainase po iu harxhohen municionet e artilerisë në vijat e frontit, që shton dallimin mes fuqisë goditëse të Rusisë dhe Ukrainës.

Ukraina në përpjekje për të zmbrapsur invadimin e Rusisë po ballafaqohet me mungesë municioni. Zëvendës i shefit të inteligjencës ushtarake të Ukrainës, Vadym Skibitsky i tha gazetës angleze The Guadian se konflikti i ka harxhuar shumicën e artilerisë ukrainase.

Skibitsky tha se kontributet nga jashtë po e furnizojnë me municion forcat në betejë, por shtoi se Ukraina mbetet ende e papërgatitur në krahasim me armikun e tyre.

“Tani gjithçka varet se çfarë na jep Perëndimi. Ukraina ka një artileri për 10 deri 15 artileri të rusëve. Partnerët tanë na kanë dhënë rreth 10 % të asaj që posedojnë”.
Sipas raporteve në Betejën për Donbas, që është shndërruar në një betejë mes artilerive Ukraina harxhon mbi 5000 predha në ditë.

SHBA së bashku me aleatët e kanë furnizuar Ukrainën me miliarda dollarë në ndihma dhe armatim për të mbrojtur veten kundër Rusisë.
“Ne kemi shfrytëzuar gati të gjitha municionet e artilerisë tonë dhe tani po shfrytëzojmë predhat e kalibrit 155 të NATO’s. Evropa po ashtu po furnizon me predha më të vogla artilerie, por numri i këtyre po bie derisa po iu harxhohen edhe atyre”.

Liderët aleatë janë ende me Ukrainën: javën e kaluar Presidenti Biden ka thënë se SHBA planifikon të dërgojë sisteme raketore dhe municion që do t’iu mundësoj ukrainasve të godasin me precizitet caqet kyçe në fushëbetejë dhe ka premtuar se nuk do t’i bëjë presion Ukrainës për të bërë koncesione.

Evropianët dhe aleatët e tjerë kanë pranuar miliona refugjatë të zhvendosur nga konflikti për të cilin Rusia është akuzuar për krime lufta ndaj civilëve. SHBA kishte njoftuar se është e gatshme të pranojë rreth 100 mijë refugjatë.

Derisa pamjet e krimeve ruse kanë tronditur botën, krizat vendore dhe gati tre muaj e gjysmë luftë kanë tërhequr vëmendjen nga lufta më e madhe në Evropë që prej Luftës së Dytë Botërore. Tani, zyrtarët e Kiev janë të shqetësuar për “rraskapitje nga lufta” në Perëndim.

/alsatm