Maqedoni: Tabletat për nervat Diazepamët merren si karamele..! (VIDEO)
“15,700 kuti me Diazepamë në fund të ditës”! Këtë e shkroi mbrëmë mjeku Nenad Lazarov në Facebook. Rastësisht ose jo, ky kërcim i lartë i recetave për qetësues erdhi pikërisht në ditën kur kërceu edhe çmimi i ushqimeve bazë dhe derivateve të naftës, për shkak të skadimit të masës “pa TVSH”.
Po rritja e përdorimit të diazepatim dhe të ngjashmëve nuk është vetëm në nivel ditësh a javësh. Rritje e dukshme ka edhe ndër vite.
Të dhënat e Fondit Shëndetësor të cilave u është referuar Dr.Lazarov tregojnë se nëse në 2014-tën janë lëshuar rreth 850 mijë receta për Diazepam, në 2020-tën, vitin kur nisi pandemia Covid, ky numër ka shkuar në 1 milionë e 300 mijë receta.
Këto janë të dhënat e Fondit që tregojnë recetat e lëshuara për disa ilaçe qetësimi nga viti 2017 deri në 2021-shin. Kërcimi i madh ka ndodhur pikërisht në vitin 2020.
Në 2021-shin numri i recetave për diazepamë është edhe më i lartë. 1 milion e 380 mijë e 405 të tilla. Po si qetësues nuk është vetëm ky lloj.
Mbledhur të gjitha së bashku, qetësues dhe antidepresantë, sipas të dhënave të Fondit, del se në vitin 2021 janë lëshuar 3 milionë e 81 mijë e 427 receta. Një matematikë e thjeshtë. Nëse ky numër pjesëtohet me 12 muaj të vitit, sepse një pacient merr recetë çdo muaj, atëherë rezulton se në Maqedoni 256,785 persona marrin me recetë për ilaçe qetësimi ose kundër depresionit.
Maqedonia ka 1,8 milionë banorë rezidentë. Hiq ata nën 15-vjeç, del se të rritur janë 1,5 milionë. Kjo, pjesëtuar me numrin e recetave të përmuajshme, rezulton se thuajse çdo i 6-ti është me ilaçe të këtij lloji.
Koha në të cilën jetojmë po bëhet gjithnjë e më stresuese, thotë psikologia dhe psikoterapeutja, Tiana Ivanovska. Nuk e përjashton mundësinë që edhe çmimet e reja të ushqimeve dhe produkteve të tjera të shkaktojnë rritje të ankthit dhe shqetësimit, por sipas saj, ilaçet jo gjithmonë ndihmojnë!
“Për mua, vetëm medikamentet nuk mund të ndihmojnë. Më së miri është të bëhet terapi e kombinuar, aty ku është e nevojshme. Të kombinohen medikamente dhe psikoterapi që të mund nga njëra anë të zvogëlohen simptomat e nga ana tjetër të ndikohen tek shkaktarët që kanë sjellë atë gjendje.
Tek rastet më të lehta absolutisht konsideroj se nuk ka nevojë për terapi me ilaçe por mund të punohet vetëm me ndihmë psikologjike dhe psikoterapi”- deklaroi Tiana Ivanovska, psikologe dhe psikoterapeute. Ka edhe shumë njerëz që kokë më vete, pa rekomandimin e mjekut, marrin ilaçe për qetësim ose antidepresantë, gjë që nuk këshillohet aspak.
VIDEO:
/tv21
