Rinia Kërçovare shpresën tek një gotë raki.. !
Kriza ekonomike, që po prek thellë në trungun e rinisë në Kërçovë, ngadalë dhe pahetueshëm po krijon vartës të rinj nga shprehitë e këqija.
Tanimë përpos rrugës së “zbrazjes së Kërçovës” nga gjenerata e re, si pasojë e mospasjes së perspektivës dhe mosgjetjes së shtegut për të zënë fillet e një jete normale, ajo ia ka mësyrë në mënyrë marramendëse rrugës së kurbetit, ku sigurojnë të ardhmen e tyre, dhe një mirëqenie për një jetë të dinjitetshme, shkruan gazeta KOHA.
Megjithatë, shtresa tjetër e të rinjve, të cilët nuk kanë “fatin” e këtyre të parëve, “shpresën”për t’i ikur zhgënjimit të tyre e kërkojnë në forma të tjera, siç janë pirja e duhanit, prova e konsumit të pijeve alkoolike, po edhe e provës së fatit nëpër lojërat e fatit nëpër kazinotë e shumta, është bërë një fenomen që po tërheq të rinjtë, krahas atyre të vjetërve, që të jenë edhe ata pjesë e klientelës së rregullt të këtyre formave të organizimit.
Tashmë, fenomeni i përdorimit të pijeve alkoolike, në veçanti në mesin e të rinjve, është dukuri që po shqetëson opinionin e Kërçovës. Kabaretë dhe lokalet e natës po mbijnë si “kërpudhat pas shiut” dhe me këtë ngadalë dhe pahetueshëm po ngritët edhe numri i vartësve nga pijet alkoolike dhe lëndëve të tjera vartëse, siç janë duhani, dhe lëndët tjera narkotike.
Për t’i ikur këtij fenomeni, që pa vetëdije po gllabëron shtresën më të ndjeshme të shoqërisë, domethënë të rinjtë, kohë më parë në gjimnazin e Kërçovës dhe nëpër shumë shkolla fillore, SPB e Ohrit dhe stacioni policor i Kërçovës, me arsimtarët e kësaj qendre arsimore, kanë mbajtur orë informuese, ku është bërë njoftimi me masat parandaluese që duhet të ndërmerren lidhur me mbrojtjen e të rinjve nga lëndët narkotike.
Konstatimi i përbashkët gjatë këtyre takimeve mes punonjësve të policisë dhe profesorëve ishte, se mjerisht ky fenomen është i pranishëm edhe në Kërçovë. Përpos, “konsumimit të lëndëve narkotike”, në Kërçovë me të madhe ka filluar të rritet edhe numri i të rinjve të cilët përdorin pijet alkoolike. Kur jemi tek struktura gjinore e kësaj shtrese të popullsisë, nuk ka ndonjë dallim. Konsumatorë të alkoolit ka nga të dyja gjinitë që përpara nuk ka qenë dukuri që edhe vajzat të jenë konsumatorë të rregullta të alkoolit.
Në njësinë e urgjencës pranë Qendrës mjekësore të Kërçovës, njoftojnë se “numri i të helmuarve nga konsumimi i pijeve alkoolike është në rritje, sidomos gjatë vikendeve, ku nëpër kabaretë dhe klubet e natës, që në Kërçovë nuk janë të pakta, bëhet konsumim i pakontrolluar i pijeve alkoolike.”Ndonëse, nëpër çdo lokal hotelier janë të ngjitura mbishkrimet “ndalohet shërbimi dhe shitja e pijeve alkoolike të personave nën 18 vjeç”, kjo dukuri po merr përmasa shqetësuese.
Specialisti i mjekësisë familjare dr.Ibraim Ramadani nga ordinanca e Zajazit, shprehet se “përdorimi i pijeve alkoolike, sidomos në sasi të pakontrolluara, po edhe në mesin e të rinjve, është një çështje me rrezik.
Përpos dëmeve në shëndetin e vetë konsumatorëve dhe rrezikut të drejtpërdrejtë, në radhë të parë për vetë ata, pastaj rreziku shtrihet edhe në shtresat e gjera të shoqërisë, ku një numër i konsiderueshëm, më pastaj i grahim makinës në gjendje të dehur dhe kështu të shkaktojnë pasoja me përmasa të paparashikueshme, ku shpesh aksidentet me pasoja humbjen e jetës janë evidente dhe të pashmangshme”.
Konsumimi i alkoolit, shpesh po shihet si dukuri, ku të rinjtë “përpos që duan të provojnë një botë ndryshe”, shfaqet edhe si modë në mesin e tyre dhe si mënyrë për të hequr qafe problemet e përditshme, të cilat nuk mund të kenë zgjidhje “në fundin e gotës”.
Nevoja e organizimit të këshillimeve, mbajtjes së orëve mësimore nëpër shkolla, po edhe aktivizimi i sektorit joqeveritar, përpos institucioneve, të cilat edhe e kanë për detyrë, është më se e pa shmangshme dhe nevojitet që sa më parë të ndërmerren masa, për t’i dalur përballë këtij fenomeni shqetësues.
“Nëpër orët e kujdestarisë, janë paraparë orë mësimore, ku nxënësit njoftohen me efektet e dëmshme nga përdorimi i alkoolit, duhanit dhe lëndëve të tjera që sulmojnë shëndetin e njeriut. Po sërish kjo nuk mjafton dhe nevojitet edhe një sensibilizim i opinionit, duke u organizuar edhe ligjërata me të rinjtë si dhe rritja e kontrollit nga organet përkatëse nëpër lokalet ku edhe shërbehen këto lloje të pijeve, të cilat drejtpërdrejt sulmojnë shëndetin e të rinjve”, thekson për KOHA, Gafurr Ajruli, profesor i biologjisë pranë gjimnazit “Drita”.
Pasojat e konsumimit të alkoolit, i kanë bërë publike edhe nga shërbimi policor i Kërçovës, ku kanë paralajmëruar një shifër në rritje të shoferëve të cilët kanë vozitur nën ndikimin e alkoolit, dhe ndaj të cilëve janë ngritur edhe procedura ndëshkuese, sepse ata drejtpërsëdrejti kanë ndikuar në rritjen e rrezikut në komunikacion.
Përdorimi i alkoolit, të shpeshtën ka rezultuar edhe me dhunën në familje, ku ka pasur edhe pasoja të zënkave të ndryshme familjare, të cilat kanë nxitur edhe konflikte dhe përdorim të pakontrolluar të dhunës ndaj të tjerëve, kanë potencuar nga shërbimi policor i Kërçovës. Sidoqoftë, është koha e fundit që këtij fenomeni, t’i dilet përpara dhe në mos të çrrënjoset plotësisht, së paku ai të zbutet në përmasat e të tolerueshmes. Lidhur me këtë përpos shkollave dhe institucioneve tjera përgjegjëse, një rol tejet të rëndësishëm mund ta luajnë edhe prindërit, të cilët do të duhet ta rrisin kontrollin ndaj fëmijëve të tyre.
/koha.mk nga Adem Xheladini
