ASh i reagon Fatmir Deharit: Partia juaj i dallashiti shifrat! Eja ta mbrojmë flamurin në Kërçovë..

Nga Aleanca për Shqiptarët kanë reaguar pas deklaratave të kryetarit të komunës së Kërçovës, Fatmir Dehari për TV21 në lidhje me vërejtjet që ASh kishte sot për procesin e regjistrimit, konkretisht për Kërçovën.

Nga ASh ftojnë Deharin të tu bashkëngjitet në kërkesën që diaspora të llogaritet në numrin e përgjithshëm të qytetarëve nëpër komuna dhe siç thonë ata “ta shpëtojmë bashkërisht të drejtën për përdorimin e flamurit kombëtar në Kërçovë”.

“Fatmir, partia juaj i dallashiti shifrat! Mbroje Kërçovën dhe jo BDI-në!Aleanca për Shqiptarët shpreh keqardhje për mënyrën e reagimit të Kryetarit të Komunës së Kërçovës, z.Fatmir Dehari. Ne sot alarmuam rrezikun që u kanoset shqiptarëve të Kërçovës si pasojë e manipulimeve me regjistrimin që ka bërë Qeveria LSDM-BDI, duke shtuar të imputuarit dhe duke fshehur të dhënat e diasporës shqiptare nga ky qytet.

Dehari tha që e kemi dallash, ndërsa ne i bëjmë thirrje që të kthjellet dhe ta kuptojë dallashin e vërtetë. Dehari sot nuk duhet të jetë në mbrojtje të partisë dhe Qeverisë, por në mbrojtje të shqiptarëve të Kërçovës.

E kujtojmë Deharin se shefi i Qeverisë së tyre, Kovaçevski tha që edhe përfaqësimi nëpër institucione do të bëhet sipas përqindjes së banorëve rezident, duke paralajmëruar një qasje të këtillë edhe për të drejtat e tjera kolektive të shqiptarëve”, thuhet mes tjerash në njoftimin e ASh-së.

/tv21