Unë e urrej politikën…

E urrej politikën, se ajo e robëron shpirtin e njeriut dhe krijon mitin e rrejshëm. Politika ka shumë formë dhe aspak përmbajtje.

Strumbullari i veprimtarisë së saj është interesi personal, grupor, farefisnor para mirëqenies kolektive, ajo është një dramë që s’mbaron kurrë, që josh një publik shurmemec, pa sens për artin.

Politika është mjet, është qëllim, është dekadencë. Politika nuk ka arshin, ajo privilegjon servilët, anatemon shpirtin kritik, minon lirinë dhe demokracinë.

Tipari i saj dallues është mediokriteti, ajo e lartëson atë dhe përçmon mendjen e ndritur. Politika përjashton, përçan, shpie në konflikte, nuk njeh vlera, është miope.

Politika është anti-progresiste, eksploatuese, varrmihëse, vdekjeprurëse. Ajo krijon monopole, prodhon populizëm, lind diktatorë, parazitë, të cilët pasurohen në emër të popullit, të cilit ia thithin gjakun me pambuk.

Ajo është drogë, krijon ëndërrimtarin, njeriun hazërxhi, jopunëtorin, e prish njeriun, duke e nxitur shpirtin lakmitar, të pangopur në të, sa të joshet deri në krim.

Të paktën, këtë imazh po e imponon politika te ne, prandaj dhe unë e urrej atë, ndiej neveri …
Shkruan Dr. Arbër Çeliku në facebook

/ms