ShH “Kërçova” në Vjenë, dinjitet dhe krenari e jonë

Sivjet për herë të dytë radhazi, Shoqata Humanitare « KËRÇOVA » në Vjenë, organizoi një takim dinjitoz, të pasur me program kulturor dhe artistik shembullor. Të ftuar ishin, përveç mërgimtarëve të anës së Kërçovës, edhe shumë mysafirë nga të gjitha trojet tona.

Para se të jap një tablo dhe vlerësimin mbi rrjedhën dhe përmbajtjen e manifestimit të kësaj fundjave (23, 24 dhe 25 prill) në kryeqytetin austriak, dua t’i them disa fjalë për organizatoren, ShHK e cila reflekton me transparencën e saj në të gjithë sektorët e funksionimit shoqëror.

Shoqata u themelua më 15 shtator 2014, kurse nga qershori i vitit të kaluar, selia u vendos në lokalin aktual që përbëhet nga një mori lokalesh përcjellëse si salla e spektakleve me kapacitet prej 150 vendesh e cila me funksionalitetin e vet shërben edhe nevoja të tjera të mërgimtarëve si ngushëllimet (kryeshëndosha)…, sallë e adaptuar për festa fetare (faltore), kuzhinë moderne me lokalin përcjellës, gjegjësisht restoranti, një pjesë e përshtatur për lojëra shoqërore me fryme sportive si “Shigjetëza” (Gjerm. Wurfpfeilspiel; Ang. Darts) por mbi të gjitha, më mbresëlënës ishte fakti se pranë shoqatës vepron Forumi i Gruas Shqiptare (FGSh – Wien) dhe posedon byronë e veçantë, tejet funksionale dhe të pajisur bukur.

Aktiviteti i ShH “Kërçova” në plan të parë konsiston në ndihma të gjithmbarshme dhe në më tepër lëmi pa u përkufizuar vetëm në ndihmë materiale për nevojtarët. Imune ndaj ndaj frymëve politike, aktivistët i janë dhënë me ngulm dhe vendosmëri çështjes së mësimit plotësues për Gjuhë Shqipe, Histori Kombëtare, Gjeografi dhe kulturë të përgjithshme në kontekst atdhetar.

Si funksionon “Kërçova”? Natyrisht, në ballë të saj qëndron Kryetari Rexhep Sula, i asistuar në çdo kohë nga anëtarët e kryesisë Halil Halili – Nënkryetar, Enver Abazi – Sekretar, Qemal Neziri – Arkëtar; të ndihmuar pa hezitimin më vogël nga të gjithë anëtarët dias nga të cilët pata mundësinë t’i njoh më afërsisht si z. Rrahim Mehmedi, Bajram Zenku, Nashit Sejdini…

Kryesinë e Shoqatës e formojnë nga dy anëtarë të zgjedhur të çdo fshati dhe pikë më e shëndoshë në këtë strukturë është transparenca. Nuk ka asgjë që vendoset në kuluare apo në mbledhje paraprakisht të mbyllura të kryesisë. Çdo vendim merret haptas, çdo hyrje dalje të ardhurash bëhet e ditur që në fillim. Të gjithë personat që kontaktova gjatë manifestimit treditor, me krenari më flitnin për këtë çiltërsi që aq shumë na mungon në politikë dhe në jetën shoqërore. “Atë që e vendosim në Shoqatë, e dinë edhe fëmijët tanë nga se edhe atyre iu flasim në shtëpi. Asnjë sekret financiar apo aktivitet tonin”, ishin fjalët e këtyre aktivistëve bujarë, duke nisur nga z. Sula, z. Halili, anëtarësia e më gjerë akoma, me një fjalë, të gjitha me të cilët bisedoja. Personalisht u ndjeva shumë krenar që isha në mesin e tyre që i kushtojnë rëndësi të veçantë respektit, humanizmit dhe angazhimit të rinisë në poret e jetës pa intriga që krijojnë shoqëri të shëndoshë për një ardhmëri të shëndoshë.

Forumi i Gruas Shqiptare, është një kaptinë më vete në këtë kuadër aktivitetesh të përbashkëta të ShH “Kërçova”. Në një bisedë të shkurtër iu luta Kryetares , Dr. Gozime Sula të na njofton me aktivitetet dhe projektet e tyre.
“Forumi filloi aktivitetin me 8 Shkurt të këtij viti duke zgjedhur kryesinë në përbërje të aktivisteve të dalluara Sihana Ballazhi, Bukurije Zenku, Zumrije Azizi, Selvije Rizmani, Hajrije Zenku, Lumtirije Jusufi, Arlinda Sadiku, Gzime Zenku, Nazlije Abazi dhe Gzime Alili.”

Sa i përket punës dhe qëllimeve të Forumit, m’u tha se fillimisht janë bërë manifestime të ndryshme për femrat dhe fëmijët;
kurse të gjuhës shqipe për nëna;
aktivitet sportive javore për mbarëvajtje shëndetësore
takime dhe mbledhje të rregullta;
dhe pikë tejet e rëndësishme për të ardhmen e afërme është ngritja e mësimit plotësues për fëmijët për të cilën gjë janë bë të gjitha demarshet e duhura pranë autoriteteve të kryeqytetit dhe pritet që së shpejti të fillohet me punë për të cilën kërkohet gati patjetër të jetë një albanolog edhe pse në mungesë të këtij profili mund të angazhohet një pedagog ose historian.

Ecuria e manifestimit
Paragrafi i mëposhtëm, zakonisht meriton një qasje më të detajuar me vet faktin se ishte një takim i mahnitshëm shqiptar. Natën e parë u shtrua darkë me anëtarët dhe shumë mysafirë që mbërritjen nga dita e parë dhe nga të gjitha trojet tona. Kënga dhe vallja burimore e pastër dhe e mahnitshme, vazhdoi gjatë tërë mbrëmjes së premtes. Dita vijuese ishte e rezervuar për program kulturo-artistik në sallë të huazuar e cila numëron njëmijë vende. Befasia më e madhe për mysafirët në fillim ishte se kjo sallë gjigante, u mbush gati mistershëm. Ngelën vetëm ca karrige të lira, ndoshta thjeshtë nga fakti se një numër të rinjsh rini të gatshëm për shërbim të ndryshme pasi që shërbimet, të them, “hotelierike”, bëheshin nga kuadrot profesionale të pronarëve të sallës.

Këtë mbrëmje u vë re një mjeshtri e mrekullueshme o organizatorëve apo ndoshta edhe vet oratorëve: asnjëri prej tyre nuk e bëri “tërkuzë”… Koncizë, të qartë dhe natyrisht që duartrokiteshin me sinqeritetin më të madh.
Pjesa muzikore e pasuruar me skeçe humoristike i jepte gjallërinë e sublime mbrëmjes e cila u pasurua me një Ekspozitë pikturash të dy figurave të njohura shqiptare nga arti figurativ: z. Rexhep Goçi me simbolikën e tij dhe z. Vesel Çeliku me mozaikun e tij poliedrik me të cilin edhe ka bë emër në qarqe perëndimore.

Pikturat Mbretëresha Teuta, Doruntina dhe Arbri me fyell (të gjitha vaj mbi pëlhurë) të R. Goçit dhe Skënderbeu e Dasma s’ka mbarua e z. Xhaferri, edhe njëherë, ishin vula e bukurisë dhe aftësisë artistike të dy piktorëve tanë.

Marr nga botasot