Lavrov ngritë disa dyshime, përfshinë shqiptarët në trazitat e Ukrainës..
Bombardimi i një kopshti në rajonin e Donbasit ka shkaktuar akuza të reja mes Moskës dhe Kievit, shkruan Alsat.
Ministri i Jashtëm rus Sergei Lavrov, duke zbuluar se po kontrolloheshin informacionet nëse mercenarët nga Shqipëria, Kosova dhe Bosnja e Hercegovina po krijonin trazira në rajon, theksoi se ukrainasit kishin shkelur Marrëveshjen e Minskut.
“Jemi shumë të mërzitur nga raportet e djeshme dhe të pardjeshme – për granatimet e shpeshta, që janë të ndaluara nga Marrëveshja e Minskut, dhe në lidhje me këtë dua të theksoj faktin se kjo nuk është hera e parë që regjimi në Kiev ka shkelur rëndë detyrimet e saj”, tha Sergei Lavrov – Ministër i Punëve të Jashtme të Rusisë.
Nga ana tjetër, Ukraina dhe partnerët e saj perëndimorë janë të bindur se pas sulmit qëndrojnë forcat pro-ruse, dhe nuk i besojnë Moskës për tërheqjen e trupave dhe armëve nga kufiri, duke kërkuar prova të forta.
“Edhe pse Rusia ka njoftuar se po i kthen forcat e saj në garnizon, ne ende nuk e kemi parë këtë. Në fakt, ne po shohim më shumë forca, që lëvizin në atë rajon kufitar”, pohoi Llojd Austin – Sekretar amerikan i Mbrojtjes.
Ministri ukrainas i mbrojtjes pretendon se aktualisht janë rreth 130 mijë trupa ruse në kufi, por nuk beson se Rusia do të sulmojë.
“Ka disa data të ndryshme për disa ngjarje dhe skenarë të ndryshëm, por ushtria ukrainase i ka studiuar të gjitha këta skenare dhe është gati. Në asnjë mënyrë nuk e nënvlerësojmë kërcënimin, por mundësia e përshkallëzimit është relativisht e ulët përballë një pushtimi të madh të Ukrainës”, theksoi Oleksiy Reznikov – Ministër i Mbrojtjes i Ukrainës.
Departamenti Amerikan i Shtetit ka thënë se Sekretari i Shtetit Antony Blinken do të takohet me Lavrovin javën e ardhshme, nëse Rusia nuk pushton Ukrainën deri atëherë.
Ndërkohë mediat amerikane ndajnë informacione se data e re e mundshme e sulmit është 20 shkurti, kur përfundojnë stërvitjet ushtarake ruso-bjelloruse.
Ukraina është temë kryesore në Konferencën e Sigurisë së Mynihut, ku Sekretari i Përgjithshëm i NATO-s, Jens Stoltenberg dhe Zëvendës Presidentja e SHBA, Kamala Harris theksuan se integriteti territorial dhe sovraniteti i Ukrainës duhet të respektohet.
/ Alsat.mk
