Zaevit i plasën bombat në oborrin e vet..

I. Ngritja e beftë e Zoran Zaevit
Është rasti i vetëm dhe unik në botë që një kryetar partie (Zoran Zaev) bëhet kryeministër i Maqedonisë me një USB, të marrë në rrethana të panjohura, të paktën, për opinionin publik.

Vetëm se ai, fillimisht e luajti mirë lojën. Partia e tij LSDM, me orientim të majtë dhe e indoktrinuar thellë në Shkollën famëkeqe të Kumrovcit, e cila neve shqiptarëve historikisht na e ka nxirë jetën, në kohën e pluralizmit (1990 e deri më sot), në Maqedoni kurrë nuk i ka fituar zgjedhjet, por ka ardhur në pushtet në sajë të intrigave, mashtrimeve dhe eksponentëve të tyre shqiptarë, të shkolluar dhe privilegjuar gjatë kohës së Komunizmit, me synimin e vetëm që shqiptarët kudo në vendet e ish-Jugosllavisë të vazhdojnë të jetë të sunduar dhe të nënshtruar.

Për ilustrim mjafton të përmendim diskriminim e mjaftueshëm në infrastrukturë, ujësjellës, shkollim, kulturë, shkencë, sport, përfaqësimin në piramidën e shtetit, rastet e ndërhyrjes së dhunshme policore-shtetërore si në Ladorisht, Tetovë, Gostivar, represionin e paparë shtetëror ndaj popullatës shqiptare të shoqëruar me dëbim masiv, etj.etj.

Zaevi, duke shfrytëzuar mjeshtërisht revoltën e madhe ndaj BDI-së pas vitit 2016, që ishte grumbulluar shkaku i diferencimit të egër, aferave korruptive, uzurpimit të pronave publike, krimit urban, etj., e preku nervin e qytetarëve shqiptarë, duke bërë që një pjesë e mirë, por edhe duke zgjuar ndjenjën e fjetur kumroveciane të një pjese të vogël shqiptare, fitoi një simpati të gjerë, për më tepër, ai i ngjalli shpresat për një të ardhme më të mirë. Kështu dhe me votat shqiptare (deri në 70 mijë sipas disa kalkulimeve publike), edhe pse humbës në zgjedhje, arriti të formonte qeverinë në vitin 2017.

Ai premtoi një kthesë radikale shoqërore, duke premtuar “një jetë më të mirë për të gjithë”, premtoi publikimin e bombave, zbardhjen e rasteve të montuara politike, skanimin e sistemit të kalbur shtetëror dhe një skrining themeltar të gjyqësorit të korruptuar dhe të diskredituar fund e krye.
Megjithatë, Zaevit bombat i plasën në oborrin e vet dhe iku kokulur, me bishtin ndër shalë nga skena politike, si humbësi më i madh në historinë e Maqedonisë së Veriut.

II. Në çka konsiston dështimi i Zoran Zaevit?!
E para, ai lidhi partneritet me një parti, e cila, ndonëse është fund e krye e kalbur, arrin ta ruajë kohezionin e brendshëm politik. Funksionarët e përjetshëm dhe të fuqishmit e BDI-së, nuk i lidh asgjë tjetër mes vete, përpos korrupsionit dhe, sado që në horizont të konturohen pakënaqësi , inate dhe urrejtje brenda përbrenda kësaj partie politike, ata nuk shqiten dot nga njëri-tjetri, lidhja e tyre është e imponueshme, e domosdoshme, e patjetërsueshme, sepse mirëqenia, pasurimi, pushteti i tyre ka lindur si rrjedhojë e varësisë politike.

80% e tyre nuk kanë asnjë profesion dhe pa partinë, ata mbeten rrugëve, pronat dhe milionat e tyre avullohen brenda natës. Zaevi erdhi në pushtet si rrjedhojë e shqiptarëve të pakënaqur nga politikat diferencuese dhe inkriminuese të BDI-së, por dhe iku shkaku i pakënaqësisë së koalicionit të partisë së tij me BDI-në.

E dyta, Zaevi premtoi shumë, ai u shfaq si një Harry Potter me shkopin e tij magjik, pa i bërë kalkulimet siç duhet në realizimin e këtyre premtimeve. Nuk bëhet pastrimi i aparatit shtetëror pa një plan të mirëfilltë dhe substancial skriningu, për më tepër, kur bën pakt me djallin.

E treta, në asnjë vend të botës nuk ndodh që të ketë aq shumë afera korruptive dhe tragjike si rasti Katica Janeva, Boki 13, Llaskarca, spitali modular i Tetovës, djegia e 45 jetëve të pafajshme në autobusin në Bullgari dhe askush të mos japë përgjegjësi.

Ka edhe shumë të tjera, por sa për ta sqaruar fenomenin Zaev, këto janë të mjaftueshme. Zaevi iku si një faqezi, jo se deshi ai, por u detyrua të ikte. Dhe, mirë bëri që iku, ashtu-ashtu Maqedonia e Veriut kurrë nuk ka qenë më keq se në kohën e tij. Vetëm se pas Zaevit priten edhe ditë më të këqija, këtë nuk e luan topi.

III. Ndërthurjet politike të së tanishmes në RMV
Me zgjedhjet lokale të tetorit, u dëshmua qartë se VMRO-ja është fuqizuar tmerrshëm, kurse në taborin shqiptar, u shpërfaq në horizont fakti se ka një parti që është BDI-ja dhe ca mutacione të saj, që ndërrojnë vetëm emrat dhe rolin çdo 3-4 vjet, sa herë që kjo parti fillon e humb legjitimitet ndër shqiptarët. Kësisoj po mbahet me plan nën kontroll populli shqiptar në RMV, që të mos fillojë e të ftillohet një lëvizje për të qenë, e cila do të mund të bënte kthesën e shumëpritur sa i përket mirëqenies dhe interesave tona kombëtare.

Pas Zaevit LSDM-ja vështirë se do t’i mbijetojë kohës, VMRO-ja do të fuqizohet edhe më shumë dhe do ta mbajë për gjatë kohë pushtetin. Kurse partitë shqiptare edhe gjatë kohë do të shërbejnë si mish për top gjatë rokadave të pushtetit, me qëllim të shpëtimit të lëkurës së funksionarëve të tyre të zhytur deri në fyt në korrupsion, kurse interesi kombëtar do të shërbejë si dekor në mozaikun e tyre bajat dhe të ndërndyrë politik.
Shkrun Dr. Arbër Çeliku në facebook

/ms