Maqedonia edhe këtë vit pa datë për nisje të bisedimeve me BE-në..

Vendet anëtare të Bashkimit Evropian kanë arritur kompromis për përfundimet në lidhje me procesin e zgjerimit, por ambiciet për mbajtjen e konferencës së parë ndërqeveritare me Shkupin dhe Tiranën nuk janë pjesë e konkluzioneve të sotme.

Pas negociatave të sotme midis ministrave për Çështje Evropiane nuk u dha përcaktues kohor se kur Maqedonia e Veriut dhe Shqipëria do të nisin procesin e bisedimeve me BE-në.

“Këshilli me padurim pret mbajtjen e konferencave ndërqeveritare me Maqedoninë e Veriut dhe Shqipërinë, sa më shpejtë të jetë e mundur pas miratimit të kornizave negociuese nga ana e Këshillit”, shkruhet në përfundimet e sotme të miratuara nga ana e ministrave dhe përfaqësuesve të vendeve anëtare në Këshillin për Punë të Përgjithshme.

I pyetur se pse nuk ka kornizë kohore në konkluzionet për konferencën e parë ndërqeveritare si më parë, sekretari shtetëror për diplomaci në Slloveni, Gashper Dozhvan tha se kjo praktikë nuk është diçka e pazakontë.

“Disa nga hapat që ishin planifikuar fillimisht nuk janë të realizueshme këtë vit. Ajo që ne fillimisht parashikonim të arrinim nuk ishte e realizueshme këtë vit dhe kjo është arsyeja faktike pse “këtë vit” nuk figuron më në konkluzione. Ne duhet të miratojmë kornizën e negociatave, ky është një proces tjetër që duhet të fillojë sa më shpejt. Dhe meqenëse kemi një qeveri të re në Bullgari, jemi optimistë”, tha mes tjerash Dozhvan.

/tv21