Kërçovë: Interes i madh i qytetarëve për vaksinim kundër gripit sezonal..

Në Kërçovë sot filloi vaksinimi kundër gripit sezonal. Vaksinat janë ndarë në dy pika – në Shtëpinë e Shëndetit merren vaksinat falas, ndërsa në Qendrën për Shëndet Publik – vaksinat komerciale.

“Shtëpia e Shëndetit Kërçovë ka marrë 650 vaksina falas prej të cilave tashmë qindra janë harxhuar ditën e parë, sepse interesi i më të moshuarve, të sëmurëve kronikë dhe punonjësve shëndetësorë për këtë vaksinë është shumë i madh.

Nëse vaksinimi vazhdon me këtë ritëm, shpejt do të harxhohen. Vaksinohen vetëm personat të cilët janë paraqitur përmes aplikacionit të njohur në internet” tha Mira Mojsoska, infermiere përgjegjëse.

Vaksina falas kundër gripit qytetarët mund ta marrin në orët e pasdites, në pikën e njëjtë ku merren edhe vaksinat kundër Kovid-19.
Qendra për Shëndet Publik – Kërçovë, ndërkaq, disponon me 300 vaksina komerciale. Pak më i ulët është interesi për vaksinat kundër gripit që qytetarët duhet të paguajnë.

“Në Qendrën për Shëndet Publik disponojmë me 300 vaksina. Interesi i qytetarëve është mesatar dhe për secilin që dëshiron ta marrë vaksinën për gripin sezonal duhet të paguajë 800 denarë. Presim që në ditët në vijim interesi të rritet”, thonë nga QSHP – Kërçovë.

/zhurnal