Maqedoni qytetarët mezi ngrohin vetëm një dhomë..!

Sipas hulumtimit të “The Climate Herald”, një pjesë e madhe e popullsisë në Maqedoninë e Veriut, përballet me varfërinë energjetike. Sipas të dhënave të fundit nga Eurostat, rreth 25 për qind e qytetareve në Maqedoninë e Veriut, kanë deklaruar se nuk mund t’i ngrohin shtëpitë e tyre siç duhet. Ndërsa kjo mesatare në Bashkimin Evropian (BE) është 7.3 për qind.

Nga ana tjetër, qytetarët që marrin ndihmë sociale apo ndihmë të garantuar minimale, nga Qeveria përfitojnë nga 1.000 denarë çdo muaj për pagimin e faturës mujore të rrymës elektrike. Këtë të drejtë e shfrytëzojnë rreth 35.000 qytetarë që janë përfitues të ndihmës sociale dhe afër 10.000 qytetareve të shtyrë në moshë që nuk marrin pension. Derisa vitin e kaluar, Komisioni Rregullator, inicioi një rritje të numrit të qytetareve që do marrin subvencione për pagimin e faturës së energjisë elektrike.

Nga Shoqata “Veprat e vërteta të mirësisë”, kanë deklaruar se një nënë vetushqyese, bashkë me djalin e saj të sëmurë kanë qenë pa energji elektrike për më shumë se gjashtë vite. “Një familje me tre fëmijë, derisa kryefamiljari është sëmurë ka ngecur me borxhe dhe si shkak i pamundësisë së fondeve, ata nuk mund ta paguanin faturën e tyre dhe energjia elektrike u është ndërprerë”, thanë nga shoqata Veprat e vërteta të mirësisë.

Sipas tyre, në një rast tjetër ku një baba jeton me djalin e tij ku dhe kanë të ardhura minimale dhe të paqëndrueshme, kanë detyrime të papaguara dhe ata borxhin e kanë ndarë në këste në mënyrë të mos u ndërpritet energjia elektrike. Këto janë vetëm disa nga historitë dhe ndodhitë të cilëve kjo shoqatë përpiqet t’ju ndihmoj në pagimin e faturave të tyre të energjisë elektrike.

Toni Stankovski, nga kjo shoqatë, ka deklaruar se vite me radhë se ata kanë ndihmuar familje dhe qytetarë me kushte të vështira, derisa në vitin e kaluar filluan me idenë “Paguaj faturën për të tjerët”. “Ky projekt është një platformë përmes së cilës mund të paguani fatura për njerëzit tjerë të cilët i përkasin kategorisë së rrezikuar. Nevoja për ndihmë është më e madhe dhe nuk ka mundësi asnjë organizatë t’u ndihmoj të gjithë qytetarëve që janë në rrezik nga varfëria”, shtoi ai.

Stankovski ka deklaruar se gjendja më e ndjeshme dhe trishtuese është kur shohin familje ku është fikur energjia elektrike në periudhën e dimrit kur është ftohtë dhe nuk kanë ngrohje. “Ka raste edhe ku në disa familje ka një anëtar të sëmurë që ka nevojë për kujdes shtesë përveç nevojës bazë për të pasur energji elektrike, ushqim dhe ujë”, ka nënvizuar ai. Sipas Platformës, “Ways2help”, 1.119 fatura u paguan në një vit, dhe kishte 1.077 donatorë. Në këtë mënyrë, ata ndihmuan 159 familje për të paguar faturat e tyre.

Ndryshe, çmimi i energjisë elektrike në vendin tonë u rrit në gusht të vitit të kaluar me 7.4 për qind dhe gjithashtu një rritje tjetër në korrik, por për të zvogëluar goditjen ndaj qytetarëve, qeveria uli TVSH-në e energjisë elektrike nga 18 në 5 për qind, duke i lënë faturat të pandryshuara. Megjithatë, ulja e TVSH-se do të jetë e vlefshme vetëm deri në fund të qershorit 2022. Pastaj TVSH-ja gradualisht do të rritet për t’u kthyer në 18 për qind, në vitin 2023 ku dhe faturat e energjisë elektrike do të jenë më të larta.

/(koha.mk)