Diaspora e Zvicrës rreshtohet pas Fatmir Limanit..(FOTO)
Të nderuar bashkëatdhetarë.
Të dashur dhe të respektuar kërçovarë.
Më lejoni t’u përshëndes përzemërsisht dhe me dëshirën e një fillim- fushate të mbarë. Fushatë kjo të cilën për dallim nga disa që kësaj radhe e neglizhuan mërgatën dhe deklaruan se votat tuaja do ti kompensojnë me votat e të tjerëve, unë dhe shtabi im zgjedhor me respektin më të madh e nisim fushatën tonë pikërisht nga mërgimi, nga pjesëtarët të cilët vulosën fitoren e vitit 2013, dhe nga pjesëtarët të cilët vulosën sa herë fatin dhe proceset mbarëkombëtare.
Të nderuar pjesëmarrës.
Nuk mendoj për veten se jam më i miri, por shoqëria dhe ekipi im, kam bindjen se janë më të shkëlqyerit.
Ata nuk kanë qenë asnjëjerë përfitues politik, nuk kanë bërë lojëra në emër të kombit, si dhe nuk janë ofruar paraprakisht me pazare !
Janë njerëz që ia duan të mirën vetes, familjes së vet, kombit të vet, dhe gjithë qytetarëve të Kërçovës me rrethinë.
Bashkëpunëtorët e hartimit të programit janë munduar deri në imtësira të analizojnë nevojat e qytetarëve, dhe të identifikojnë të gjitha dobësitë e zhvillimit normal të një komune, me të gjitha resurset, pasuritë natyrore, dhe mundësitë e shfrytëzimit të tyre, për një jetë dinjitoze të qytetarit, sepse ky popull, brez pas brezi asnjëherë nuk arriti t’i shtrijë këmbët rehat në shtëpinë e vet, me familjen e vet, dhe gjithmonë ju shkoj jeta në mërgim, në Evropë, Amerikë dhe vende tjera.
Me siguri do pyesni, dhe keni pyetur veten se çka mund të bëj Fatmiri për Kërçovën që nuk e kanë bërë të tjerët brenda ketyre viteve?
Unë kam bindjen se bashkarisht me rininë e Kërçovës do e bëjmë atë që i ka munguar komunës më tepër vite, do formojmë elitën e re intelektuale, kombëtare dhe qytetare, e cila do jetë e aftë të bartet me proceset e ndryshimeve të kohës së tranzicionit.
Në këtë drejtim, Rinia jonë është shumë mbas, ndoshta me fajin tonë, ndoshta me politikat e gabuara të të moshuarve, që shumë pak kanë bërë për tu hapur rrugën drejt ardhmërisë!
Qellimi i atyre që më kanë propozuar për kandidat të mundshëm dhe qëllimi im është ndryshimi i politikbërjes në komunën e Kërçovës, marrja e përgjegjësisë mbi vete, për të siguruar një ardhmëri më të mirë për gjeneratën tonë dhe për gjeneratat që vijnë pas.
Jemi të përcaktuar që të ecim me kohën dhe t’i marrim seriozisht këshillat dhe kritikat e miqëve tanë.
Ne nuk duhet asesi të vazhdojmë me avazin e vjetër të tipit;
– ti më mbro mua, unë të mbroj ty,
– ti më jep mua, unë të jap ty,
– ti më siguro votat, unë ti siguroj tenderat, e kështu me radhë.
Nëse sot nuk e ngrejmë zërin, nesër është vonë.
Andaj ju ftoj që së bashku t’i themi stop korrupsionit, mashtrimit, keqpërdorimit, keqmenaxhimit, pasurimit mbi kurrizin e tjetrit, vjedhjes dhe paperspektivës për fajin e politikanëve të harxhuar, që popullin e llogarisin të papjekur, që mashtrohet dhe vlerën e votës së vet e fal për hatër, ose e shet për një post a’pozitë.
Ju bëj apel nënave, grave, motrave, që të ngrejnë zërin lartë, dhe të votojnë kundër politikanëve dhe politikave që shkelin nderin e tyre.
Gjithmonë jemi mësuar të akuzojmë palën tjetër se ata i kanë fajet qe jemi në këtë gjendje, por asnjëherë nuk kemi bërë analiza të thella sa jemi ne fajtorë për këtë gjendje. Ne dëshirojmë të realizojmë lidhjen e besimit në mes qytetarëve dhe përfaqësuesve të saj në institucione të ndryshme. Për këtë arsye, ne ofrojmë një agjendë të detajuar të renovimit kombëtarë, një zotim të shkruar se do t’i japim fund pengmarrjes disa vjeçare të komunës së Kërçovës nga disa persona dhe do të sjellim në komunë një shumicë tjetër që do ta transformojë mënyrën se si funksionon komuna dhe këshilli.
Ky ndryshim historik do të jetë fundi i qeverisjes megalomane dhe e papërgjegjëshme në harxhimet e parave publike.
O, si nuk kam nji grusht të fuqishëm! -shpërthen Migjeni tek “Recitali i Malsorit”.
Ah sikur … – të shpërthejnë njerëzit në momente dhe situata të ndryshme kur vërejnë se diçka nuk shkon dhe se shumë gjëra mund të rregullohen dhe përmirësohen për të patur një qytet më të pastër, për më shumë parqe, shkolla, lulishte, fusha lojrash dhe për të krijuar një harmoni të qytetarëve me ambientin. Andaj ne zotohemi për një agjende të reformës, që sjell siguri, drejtësi dhe zhvillim të synuar.
Reformave të funksionimit të udhëheqjes me komunën, respektit ndaj njerëzve që ne u shërbejmë dhe i përfaqësojmë, dhe renovim të ëndrrës për qytetin e Kërçovës ashtu siç e dëshirojmë të gjithë, me arsim cilësor, zhvillim ekonomik, urbanistik, shëndetësor, ekologjik, si dhe siguri më të madhe për jetën e qytetarëve!
Kontrata jonë me ju si përfaqësues të Mërgatës nënkupton përfshirjen tuaj aktive në menaxhimin e komunës përmes këshillit të mërgatës, dhënien e mundësive për investime pa kushte dhe korrupcion, si dhe dhënien e ideve dhe propozimeve për një komunë më të mirë dhe më të zhvilluar.
Për ne ky është një fillim i sinqertë dhe një orvatje të investojmë në këto zgjedhje me një domethënie pozitive.
Ka ardhur koha ta themi të vërtetën për Kërçovën.
Ti japim fund ciklit të skandaleve dhe turpërimit.
Të gjith të ndjehemi krenar të mënyrës se si njerëzit e lirë e udhëheqin veten e tyre.
Fati ynë varet prej votës tuaj, por edhe të familjarëve që i keni në vendlindje, andaj të bëhemi bashkë dhe mos ta humbasim këtë rast!
Duke ju falenderuar për mikëpritjen tuaj, duke ju falenderuar për kohën që ndatë dhe pjesëmarrjen masive në këtë tubim, ju ftoj që më 17 tetor të vini edhe një here në vendlindje për të na mbështetur bashkë me listën e këshilltarëve të pavarur me bartës Agim Sadiku!
Të gjithë së bashku për një Mërgatë të pavarur, Drejt Amanetit të të parëve tanë!
Ju falenderoj dhe na prift e mbara!
26 Shtator 2021
Fatmir Beqir Limani
Boleros, Buch
Zvicër
FOTO:
