Kush është Zeni Ballazhi..?
Zeni Ballazhi lindi në vitin 1975, në Kërçovë . Studimet i kreu në Akademinë e Arteve të Bukura në Tiranë – Shqipëri (1998).
Në vitin 2000 merr titullin Magjistër i Arteve, në Fakultetin pranë Universitetit të Prishtinës. Po të njejtin vit përfundon kursin e specializimit në Kolegjin Nacional të Arteve të Osllos në Norvegji (ONCA).
Ka përfunduar studimet për doktoraturë në degën e Shkencave Histori e Artit Shqiptar, pranë Akademisë së Studimeve Albanologjike në Tiranë – Shqipëri dhe merr titullin “Doktor i shkencave” (2019). Prej vitit 2001 – 2020 punon si kurator dhe dizajner në Galerinë Kombëtare të Kosovës. Në shkurt – korrik 2009, dhe nga shtatori i vitit 2015, deri në gusht të vitit 2016, nga “Ministria e Kulturës, Rinisë dhe Sporteve” të Kosovës, emrohet Ushtrues Detyre i Drejtorit të Galerisë Kombëtare të Kosovës.
Ka hapur disa ekspozita personale dhe ka marrë pjesë në shumë ekspozita kolektive në Kosovë dhe jasht vendit (Shqipëri, Maqedoni, Norvegji, Francë, Japoni, Gjeorgji, Greqi, Slloveni, SHBA, Hungari, Austri, Kroaci, Zvicër etj).
Është kurator i shumë ekspozitave të organizuara në Kosovë dhe rajon.
Ka punuar si drejtor artistik (skenograf) në dhjetra filma dhe shfaqje profesionale me koproduksione të ndryshme, si dhe festival ndërkombëtare në: Maqedoni, Kosovë, Shqipëri, Norvegji, Kroaci, SHBA etj.
Menaxher artistik shumëvjeçar i Festivalit Ndërkombëtar të Monodramës “MonoAKT” si dhe pjesëmarrës në shumë festivale ndërkombëtare të filmit dhe teatrit: (Maqedoni, Shqipëri, Mali i Zi, Bullgari, Norvegji, Gjermani, Mongoli, Zvicër, Ukrainë, Rumuni, Dagestan, Moldavi, Egjipt, Rusi).
Prej vitit 2013 – 2016 është ligjerues në drejtimin “Arti Konceptual dhe mediet e reja” në Universitetin “Hasan Prishtina” – Fakulteti i Arteve, si dhe në Universitetin Shtetëror të Tetovës – Maqedoni. Në shkurt të vitit 2016, bëhet Anëtar i Akademisë Europiane të Filmit “European Film Academy” – Berlin, Gjermani. Vepra e tij ndodhet edhe në koleksionin e Muzeut të Nënës Tereze në Shkup të Maqedonisë dhe Imago Mundi Luciano Benetton Collection. Është laureuar me shumë çmime kombëtare dhe ndërkombëtare.
Emrin e tij e mban edhe logo e “100 Vjet Pavarësi”, Republika e Shqipërisë ku edhe më 26 Dhjetor 2012, me rastin e “100 Vjet Pavarësi”, dekorohet nga Presidenti i Republikës së Shqipërisë me “Medalja e Mirënjohjes”. Është autor edhe i logos dhe medaljes presidenciale “Kosova 10 Vjet Pavarësi”.
Aktualisht është Profesor Asistent në Fakultetin e Arteve në Universitetin “Hasan Prishtina”. Ka të botuara punime shkencore, simpoziume dhe ka marrë pjesë në konferenca ndërkombëtare. Nd ekspozitat e suksesshme personale vecojmë “Nata e bardhë” në Galerinë kombëtare të Arteve, Shqipëri,” I’M – Galeria Nacionale e Maqedonise, “Pa titull” Galeria e Fakultetit te Arkitektirës, Prishtinë, “Start” Shtëpa e Kulturës Kërcovë.
Eshtw fittues I dhjetra konkurseve për lloogo të institucioneve të ndryshme në Kosovë, Shqiperi e Maqedoni. Ndër filmat e suksesshëm ku ka punuar si drejtor artistik, piktor filmi, dizajner skene, janë “Kthimi”, “Klithma”, “Tri dritare dhe një varje”, “Kolona”, “Kukumi”, “Lufta mbaroi”, “Requiem for Kosova”, që kanë marrë pjesë në shumë festivale jashtë vendit. Ka punuar edhe në disa filma të metrazhit të shkurtër dhe shfaqje teatrore si “Aktori në kuti”, “Endërrat e Hamletit” etj.
Ka bashkëpunuar me pothuajse të gjithë teatrot e qyteteve n Kosovë dhe Teatrin Kombëtarë të Kosovë si skenograf në shfaqjet “ Lisistrata”, “ Kosovatrans”, “Perplasjet”, “Nje varr per majorin e Mbretit”, “Profesor gjilpëra”, “Pacientët” etj. Biografia e artistit Zeni Ballazhi është e pasur dhe shumëdimensionale ashtu sikurse edhe kontributi I tij në jetën pedagogjike, skenike dhe institucionale.
/Valmir Aziri
