Zviceranëve u ndalohet blerja në Gjermani..

Shteti (landi) gjerman Baden-Württemberg synon të kufizojë ndjeshëm trafikun e imtë kufitar për dashamirësit e sporteve dimërore dhe “shopping-turistët” në Francë dhe Zvicër, shkruajnë SDA dhe DPA.

Për këtë, ka vendosur detyrim karantine që do të zbatohet në raste të caktuara.

“Rreziku nga burimet shtesë të infeksionit për shkak të hyrjes dhe kthimit në Baden-Württemberg” është shkak për këtë vendim, thuhet në njoftimin e dhënë të martën nga qarqet qeveritare në Stuttgart.

Shtrëngimi i rregullores së karantinës për hyrje do të thotë që, për shembull, as njerëzit nga Baden-Württemberg unuk mund të skijojnë në Zvicër, as zviceranët nuk mund të bëjnë pazar në supermarket në Baden-Württemberg, transmeton albinfo.ch.

Në sfond të këtij vendimi qëndron zhvillimi ende i pafrenuar i numrit të infeksioneve në Gjermaninë Jugperëndimore dhe në rajonet kufitare.

Siç mëson agjencia e lajmeve dpa, rregullorja do të vazhdojë të lejojë hyrjen pa karantinë të atyre që kanë arsye profesionale, zyrtare, biznesi, shkollore, mjekësore ose familjare, përcjell albinfo.ch.

Kjo urdhëresë e riaktualizuar është miratuar sot dhe më pas është shpallur dhe vënë në fuqi, brenda ditës.

Me shtrëngimin e rregullores së hyrjes, Baden-Württemberg po ndërmerr një hap që Bavaria kishte ndërmarrë tashmë në fund të Nëntorit.

/albinfo