Vazhdojnë punimet për Kalanë e Kërçovës..! (VIDEO)
Me mbeturina gjithandej, pa ndriçim publik dhe pa përkujdesje.
Së fundmi Komuna e Kërçovës ka hartuar një projekt për rikonstruimin e Kalasë së Kërçovës dhe i njëjti po realizohet.
Me këtë projekt janë shtruar rrugët me bekatonka, janë vendosur disa pajisje sportive, ndërtohet një objekt i ashtuquajtur Skenë verore dhe një objekt për mbajtjen e konferencave të ndryshme.
Kryetari i Komunës së Kërçovës thotë se dalëngadalë janë duke ia kthyer bukurinë kësaj kalaje.
“Kalja e Kërçovës dikur ka qenë një vend i bukur për të gjithë qytetarët e Kërçovës por jo vetëm kaq por edhe për vizitorët dhe nga këtu lindi ideja që ne t’ia kthejmë bukurinë dhe shkëlqimin asaj kalaje dhe hartuam një projekt të cilin fatmirësisht arritëm edhe ta realizojmë, shpresoj që në afatin e paraparë ky projekt të jetësohet”, deklaroi Fatmir Dehari – Kryetar i Komunës së Kërçovës.
Por me këtë projekt nuk pajtohen arkeologët dhe historianët. Por për punimet në Kalanë e Kërçovës ka reaguar disa herë arkeologia Leonora Saliju e cila thotë se më këtë projekt Kalaja e Kërçovës e humb autenticitetin dhe identitetin e saj. Ajo thotë se me investimet në këtë kala dëmton gjurmët arkeologjike që janë të një rëndësie të veçantë për këtë qytet.
“Sa u përket punimeve në Kalanë e Kërçovës është diçka për të ardhur keq. Një monument kulture, me vlera historike dhe arkeologjike që tash kthehet në një hotspot eksperimental, ku ka kënd lojërash për fëmijë, skenë manifestimesh, aparaturë për ushtrime fizike, shëtitore dhe ndër to gjen edhe ato pak rrënoja arkeologjike nga ajo që quhet “Kala”. Para disa vitesh në kala është kryer një prospekcion arkeologjik nga prof. Viktor Lilçiç dhe janë gjetur artefakte te periudhave te ndryshme: ilire, romake, bizantine që dëshmojnë për një jetëgjatësi të këtij vendi nga antikiteti e deri më sot.
Gjithashtu para 3 vitesh janë kryer edhe disa sonda në kala ku kanë dalë në dritë edhe disa mure të periudhës bizantine nga shek: XI deri shek XV. Por sot edhe ato pak gjetje janë te pakonservuara dhe të pambrojtura. Punimet në kala kryhen pa mbikëqyrjen e një personi përkatës për mbrojtjen e monumenteve dhe pasurisë arkeologjike dhe gjithçka me vlerë, aty po shkatërrohet”, potencoi Leonora Saliju – Arkeologe.
Nga ana tjetër në këtë kala në vitin 1941 është vendosur busti i Gjergj Kastriot Skënderbeut dhe ka qëndruar deri në vitin 1948, ku siç thotë historiani Ilmi Veliu busti është larguar kur kreu i Jugosllavisë Josip Bros Tito dhe ai i Shqipërisë Enver Hoxha i kanë prishur marrëdhëniet e tyre në vitin 1948.
“Ky bust ka qëndruar në këtë kala deri në vitin 1948. Marrëdhëniet Shqipëri dhe Jugosllavi, marrëdhëniet Enver Hoxha dhe Tito kanë qenë të mira në fillim dhe kanë bashkëluftuar, bile ka qenë një plan që Shqipëria t’i bashkohet si Republika e shtatë e Jugosllavisë, mirëpo prishen marrëdhëniet pastaj dhe pas prishjes së marrëdhënieve më 1948 urdhërohet edhe heqja e bustit të Skënderbeut nga Kalaja e Kërçovës”, theksoi Ilmi Veliu – Historian.
Dehari nga ana tjetër nuk e përjashton mundësinë e kthimit të bustit pasi të përfundojnë punimet e filluara në këtë kala.
“Unë mendoj se pas përfundimit të këtij projekti në kuptimin e infrastrukturës të pasojnë pastaj edhe vlerat tjera plotësuese siç është edhe Busti i Gjergj Kastriot Skënderbeut por sigurisht edhe figurave tjera në të ardhmen”, tha Fatmir Dehari – Kryetar i Komunës së Kërçovës.
Dehari thotë se në fillim të vitit 2021 projekti për rikonstrumin e Kalasë së Kërçovës do të jetë i përfunduar dhe kjo kala do të ketë një pamje tërësisht tjetër.
VIDEO:
/ts21
