Kërçova dy herë radhazi “Qytet i kulturës”

Kërçova, komuna e vetme shqiptare që gjatë këtyre viteve fitoi garën “Qytet i Kulturës 2020”, mesa duket do ta mbajë stafetën edhe për vitin e ardhshëm. Për shkak të situatës pandemike, asnjë prej aktiviteteve të parashikuara nuk u zhvillua gjatë këtij viti, por sipas të gjitha gjasave, gjatë vitit 2021 Kërçova do të jetë epiqendra e manifestimeve kulturore.

Ngjarja kulturore që mbështetet pjesërisht prej Ministrisë së Kulturës prej 17 vitesh ka si qëllim demetropolizimin e kulturës, edhe pse rezultatet kanë qenë të diskutueshme duke bërë që vetë ministria të vinte në pikëpyetje mbajtjen e konkursit. Nga Komuna e Kërçovës pohojnë se projektet janë gati dhe shpresojnë që vitin e ardhshëm ta realizojnë, nëse fondi i miratuar prej tre milionë denarësh do të kalojë në 2021 në llogarinë e komunës.

“I gjithë manifestimi ka një kosto prej 130 mijë eurosh, ku përveç ministrisë – participojmë ne si komunë. Konkurruam me projekte të mira, hartuam një program që të paktën ashtu si edhe si na kanë premtuar, do ta realizojmë vitin e ardhshëm. Ishte e vështirë që këtë vit të mbaheshin aktivitetet me masat dhe protokollin e parashikuar, prandaj e anuluam”, thotë Emin Nasufi, udhëheqës i Sektorit të arsimit dhe kulturës në komunë.

Programi për manifestimin “Qyteti i kulturës” precizon të gjitha ngjarjet kulturore nga sferat e artit skenik, dramatik, figurativ, muzikës e të tjera që zhvillohen gjatë vitit dhe ka si qëllim që të sigurojë kushtet për një zhvillim të barabartë kulturor, akses dhe shfrytëzim masiv të vlerave kulturore për të gjithë qytetarët, por edhe për të nxitur jetën kulturore në nivel lokal.

“Programi i prezantuar nga Komuna e Kërçovës ofron përmbajtje multikulturore, pjesëmarrje në skenën kulturore lokale, si dhe pjesëmarrje të artistëve nga jashtë. Programi ka shumë projekte në të gjitha fushat dhe zhanret dhe parashikon bashkëpunim me institucione vendase dhe të huaja në fushën e kulturës, si Teatri Kombëtar i Manastirit, Shtëpia Përkujtimore e Nënë Terezës, Orkestra e Radiotelevizionit Shqiptarë dhe të tjerë.

Janë planifikuar projekte në fushën e muzikës, teatrit, folklorit, trashëgimisë kulturore dhe historike, artit, letërsisë, etj. gjë që do të kontribuojë në mënyrë të konsiderueshme në afirmimin e institucioneve, organizatave dhe subjekteve aktivitetet dhe puna e të cilëve pasurojnë ofertën kulturore të Kërçovës. Me realizimin e programit të planifikuar, do të kontribuojë në ringjalljen, afirmimin dhe shfrytëzimin e plotë të kapaciteteve hapësinore dhe vendndodhjeve në dispozicion të qytetit”, thuhet në arsyetimin e Ministrisë së Kulturës.

Demetropolizimin e kulturës dhe zhvillimin e jetës kulturore në periferi, në qyteza dhe komuna ku manifestimet kulturore janë më të rralla. Nëse vite më parë në konkursin që organizohet gjatë muajit dhjetor konkurronin dhjetëra komuna, vitet e fundit ky numër nuk i kalon dy – tre konkurrues. Sa i takon komunave shqiptare, interesimi ka qenë i vogël, duke bërë që komunat maqedonase ta mbajnë stafetën për vite me radhë, madje dy – tre herë radhazi, si Radovishi, Manastiri, Prilepi, Kumanova, Shtipi, Velesi, Kavadari, Gjevgjelia, Koçani, Kriva Pallanka, apo Krusheva.

Me përjashtim të komunës së Tetovës, që ka konkurruar disa vite më parë dhe është skualifikuar nga gara stafeta e kulturës nuk është dorëzuar në asnjë komunë shqiptare. Dibra, Struga, apo Gostivari nuk janë radhitur në listat e aplikantëve. (koha.mk)