Protesta kombëtare në Tiranë, studentëve u bashkohen pedagogët, mjekët, artistët dhe diaspora !

Në ditën e 12-të të protestës studentore, pjesëmarrës nga qytete të ndryshme të Shqipërisë pritet të mblidhen para Kryeministrisë, ndërsa solidaritet me studentët kanë shprehur edhe përfaqësues të profesioneve të tjera.

Studentët nga i gjithë vendi pritet të mblidhen këtë të shtunë në Tiranë, në kuadër të protestës kombëtare, e cila shënon ditën e 12-të të protestës studentore. Tubimit pritet t’i bashkohen pedagogë, mjekë, artistë, përfaqësues të sindikatave dhe shqiptarë nga diaspora, përcjell albinfo.ch.

Mbështetjen për protestën e ka shprehur edhe Sindikata e Pavarur e Artit, Kulturës dhe Medias e Shqipërisë, e cila ka njoftuar se do të marrë pjesë në tubimin e 24 tetorit, në shenjë solidariteti me studentët, të rinjtë dhe qytetarët.

Përmes një thirrjeje publike, sindikata u ka bërë apel anëtarëve të saj, artistëve dhe punonjësve të kulturës e medias që të mblidhen para Kryeministrisë në orën 11:00. Në njoftim, pjesëmarrja në protestë lidhet me përgjegjësinë qytetare për të ardhmen e vendit dhe mbrojtjen e të drejtave të punëmarrësve.

Ndërkaq, në orën 14:00 është paralajmëruar bashkimi i grupeve studentore në tubimin para Kryeministrisë.
Mobilizimi po zhvillohet edhe jashtë kryeqytetit. Studentët e qyteteve të tjera, të cilët gjatë javës kanë protestuar pranë universiteteve të tyre, pritet të udhëtojnë drejt Tiranës për t’iu bashkuar protestës kombëtare.

Pjesëmarrje pritet edhe nga shqiptarët e diasporës, ndërsa protestuesit vijojnë të këmbëngulin në kërkesën për dorëheqjen e kryeministrit Edi Rama, pavarësisht thirrjeve të tij për dialog.

/Albinfo.ch