Mickoski paralajmëroi skenarë të mundshëm destabilizimi !

Kryeministri i Maqedonisë së Veriut, Hristijan Mickoski, ka drejtuar kritika të ashpra ndaj Bullgarisë, duke e akuzuar se po e shfrytëzon anëtarësimin në Bashkimin Evropian për të bllokuar procesin eurointegrues të Maqedonisë së Veriut dhe për të imponuar çështje që lidhen me historinë dhe identitetin maqedonas. Në fjalimin e tij me rastin e 23 Tetorit, Ditës së Luftës Revolucionare Maqedonase, ai paralajmëroi edhe për provokime të mundshme, veprimtari të shërbimeve të ndryshme dhe përpjekje që vendi të përfshihet në problemet e shteteve fqinje.

Mickoski vlerësoi se Bullgaria ka filluar t’i përdorë mekanizmat evropianë kundër Maqedonisë së Veriut vetëm pasi u bë anëtare e BE-së, duke theksuar se më parë nuk i kishte ngritur çështjet që sot i paraqet si kushte, raportoi 4news.mk.

“Fqinji ynë lindor deri në hyrjen e saj në BE nuk kishte asnjë vërejtje për marrëdhëniet e mira fqinjësore. Deri atëherë nuk interesohej për bullgarët, për të cilët sot pretendon se është shumë e rëndësishme të jenë pjesë e Kushtetutës sonë. Askush nuk dinte për qoftë edhe një rast të vetëm të një bullgari të vetëdeklaruar të diskriminuar në shtetin tonë, megjithëse sot ankohen për disa raste”, deklaroi Mickoski.

Ai shtoi se e njëjta gjë vlen edhe për figurat historike, për të cilat, sipas tij, Sofja filloi të parashtrojë kërkesa vetëm pas anëtarësimit në Bashkimin Evropian.
“Asnjëri prej tyre nuk thoshte se Goce, Jane, Karev apo Gjorçe janë njerëzit që sot, sipas tyre, qenkan bullgarë. Dhe kështu vazhdoi deri në hyrjen e tyre në Bashkimin Evropian, kur hynë në atë dhomë ku ne nuk jemi dhe prej nga tani po i përdorin të gjithë mekanizmat për të na bllokuar”, tha kryeministri.

Më tej, Mickoski dërgoi një mesazh edhe për ata që, sipas tij, përpiqen ta ndryshojnë historinë maqedonase përmes vetos.
“Për ata që e qepin historinë sipas dëshirës së tyre dhe mendojnë se me veto mund ta riformojnë të kaluarën tonë, kam një mesazh: kujtesa jonë nuk i nënshtrohet miratimit të tyre. Asnjë presion nuk mund ta fshijë Goce Dellçevin nga zemra e popullit maqedonas”, deklaroi ai.

Paralajmërim për veprimtari të shërbimeve dhe provokime të mundshme
Kryeministri u ndal edhe te gjendja e sigurisë në rajon, duke paralajmëruar se tensionet politike dhe shoqërore në vendet fqinje mund të reflektohen edhe në Maqedoninë e Veriut.

“Sot Ballkani nuk është më fuçia e vetme e barutit. Në fakt, Evropa po shndërrohet në një vullkan të trazuar. Gjithnjë e më pak dëgjohet zëri i arsyes, ndërsa çdo ditë shohim protesta dhe forma të ndryshme dhune në Evropë dhe te fqinjët tanë. E në Ballkan, shërbimet kurrë nuk ndalojnë së vepruari”, tha Mickoski.

Ai theksoi se nuk e përjashton mundësinë që të ketë përpjekje për ta përfshirë Maqedoninë e Veriut në problemet e vendeve të tjera.
“Nuk do të më habitte nëse ka të tillë që do të përpiqen të na përziejnë në problemet e tyre ose të transferojnë një pjesë të atmosferës së tyre në përditshmërinë tonë”, u shpreh ai.

Mickoski hodhi akuza edhe ndaj një pjese të opozitës në vend, duke pretenduar se ka aktorë politikë që mund të marrin pjesë në skenarë të tillë.
“Sa u përket aktorëve të brendshëm për një lojë të tillë, kjo është shumë e lehtë. Ka disa nga opozita që për para dhe premtime të rreme për kolltuqe janë të gatshëm të bëjnë gjithçka”, deklaroi ai.

Megjithatë, kryeministri nuk përmendi shërbime konkrete, shtete apo individë që mund të qëndrojnë pas provokimeve të mundshme dhe nuk paraqiti prova për këto pretendime.
Ai theksoi se nuk do të lejojë që Maqedonia e Veriut të përfshihet në skenarë destabilizues dhe u bëri thirrje qytetarëve të mos bien pre e provokimeve dhe e, siç i cilësoi ai, çështjeve etnike të imponuara artificialisht dhe të hiperbolizuara.

“Nuk do të bie në kurthet e shërbimeve të ndryshme dhe në provokimet e paraqitura përmes lojërave dinake. Hapave të paarsyeshëm u përgjigjem me arsye, provokimeve me parime, presioneve me qëndrueshmëri dhe me besim në atë që jemi dhe çfarë përfaqësojmë”, tha Mickoski.

Pavarësisht kritikave ndaj Bullgarisë dhe paralajmërimeve për presione të mundshme, ai theksoi se Maqedonia e Veriut nuk duhet të heqë dorë nga integrimi evropian. Sipas tij, pikërisht shembulli i Bullgarisë dëshmon se sa e rëndësishme është që vendi të bëhet pjesë e BE-së dhe të marrë pjesë në mënyrë të barabartë në proceset vendimmarrëse.

“Detyra ime si kryeministër nuk është të merrem me eshtra që i përkasin së kaluarës, por të siguroj një të ardhme që u përket fëmijëve tanë”, deklaroi Mickoski.
Ai shtoi se do të vazhdojë të udhëheqë, siç e quajti, një politikë promaqedonase, duke theksuar se nuk ekziston asnjë çmim që do ta bënte të heqë dorë prej saj.

/ts